NCP Political Crisis : राष्ट्रवादीतील आमदार-खासदारांनी बंड केल्यानंतर अजित पवार आणि शरद पवार असे दोन गट पडले आहेत. दोन्ही गटाकडून आमच्यासोबत पक्ष असल्याचा दावा केला जात आहे. दरम्यान, पुन्हा एका पक्ष संघटन मजबूत करण्यासाठी शरद पवार राज्यभरात झंझावती दौरा करणार असल्याची माहिती राष्ट्रवादीचे प्रदेशाध्यक्ष जयंत पाटील यांनी दिली.

शिंदे-फडणवीस यांच्या सरकारला पाठिंबा देत अजित पवार यांनी उपमुख्यमंत्री पदाची शपथ घेतली. त्याच्या इतर आठ जणांनाही मंत्रिपदाची शपथ घेतली. राष्ट्रवादी पक्षामध्ये फूट झाल्याचे स्पष्ट झाले. या घटनेनंतर अजित पवार आणि भाजप विरोधात शरद पवार मैदानात उतरले आहे. त्याची सुरुवात सोमवारीपासून करण्यात आली. काल त्यांनी कराड येथे जाऊन माजी मुख्यमंत्री यशवंतराव चव्हाण यांच्या स्मृतीस्थळावर जाऊन नव्याने कामाला सुरुवात केली. या दौऱ्यामध्ये त्यांचे ठिकठिकाणी राष्ट्रवादीचे पदाधिकारी आणि कार्यकर्त्यांनी स्वागत केले.

शरद पवार यांनी आज सकाळी मुंबई येथील त्यांच्या निवासस्थानी प्रदेशाध्यक्ष जयंत पाटील यांच्यासोबत बैठक झाली. त्यानंतर प्रसार माध्यमांशी बोलताना त्यांनी शरद पवार यांच्या गटाची भूमिका स्पष्ट केली. जयंत पाटील म्हणाले, साताऱ्याच्या दौऱ्यात शरद पवारांनी आपली भूमिका स्पष्ट केली आहे. आगामी २-३ दिवसांमध्ये दिल्लीत कार्यकारिणीची बैठक होणार आहे. त्यानंतर नाशिक, बीड, अहमदनगर, पुणे सोलापूर आणि काही जिल्ह्यात दौरा सुरुवात केली. नाशिकपासून सुरुवात होणाऱ्या दौऱ्यात मराठवाडा, विदर्भ आणि कोकणातील जिल्ह्यांमध्ये पक्ष संघटना मजबूत करण्यासाठी पदाधिकारी आणि कार्यकर्त्यांशी संवाद साधला जाणार आहे.