Ashadhi Ekadashi 2023 : आषाढी एकादशीनिमित्त राज्यभरातून लाखो वारकरी पायी पंढरीची वाट चालत आहेत. मंगळवारी अखेरच्या मुक्कामानंतर आज पंढरपूरकडे निघालेले पालखी सोहळे पंढरीत प्रवेश करणार आहेत. त्याचबरोबर शासकीय महापूजेसाठी आज मुख्यमंत्री एकनाथ शिंदे यांच्यासोबत डझनभर मंत्री हजेरी लावणार आहेत.

टाळ-मृदुंग आणि हरिनामाचा जप करीत राज्याच्या कानाकोपऱ्यातून आलेल्या विविध संतांचा पालखी सोहळा मजल दर मजल करत पंढरपुरात दाखल होऊ लागला आहे. आषाढी सोहळ्यासाठी लाखो वारकरी दाखल झाल्याने शहराचे वातावरण भक्तिमय झाले. विठ्ठलाच्या दर्शनासाठी भाविकांची प्रचंड गर्दी झाली आहे.

आषाढी एकादशीच्या शासकीय महापूजेसाठी मुख्यमंत्री एकनाथ शिंदे हे सहकुटुंब आज दुपारी 2 वाजता सह्याद्री अतिथीगृह, मुंबई येथून विमानाने सोलापूरला येणार आहेत. तेथून हेलिकॉप्टरने दुपारी चार वाजता पंढरपूरमध्ये दाखल होणार आहेत. तिथे 'पर्यावरणाची वारी पंढरीच्या दारी' या जनजागृती उपक्रमाच्या समारोप सोहळ्याला उपस्थितीत राहतील.

मुख्यमंत्र्यांच्या दौऱ्यापूर्वी मुख्यमंत्र्यांनी कार्यकर्त्यांना आवाहन केले की, पंढरपुरात विविध राजकीय नेत्यांच्या स्वागताचे फलक आणि बॅनर्स लावण्यापेक्षा श्री विठ्ठल रखुमाईच्या दर्शनासाठी येणाऱ्या वारकऱ्यांचे स्वागत करणारे फलक लावा.