Maratha Reservation Protest : मराठा आरक्षणाच्या मागणासाठी मनोज जरांगे यांच्या उपोषणाचा आज दहावा दिवस आहे. त्यांच्या आंदोलनाला राज्यभरातून प्रतिसाद मिळत असून ठिकठिकाणी मराठा समाज रस्त्यावर उतरला आहे. दरम्यान, राज्य सरकारने तोडगा काढण्यासाठी मराठा समाजातल्या ज्या लोकांकडे कुणबी असल्याची नोंद आहेत, त्यांना कुणबी दाखला देण्याचा निर्णय घेतला आहे.

त्यावर आज जरांगे-पाटील यांनी पत्रकार परिषद घेऊन आपली भूमिका स्पष्ट करत कालच्या निर्णयाचा काहीच फायदा होणार नाही. मराठा समाजाला सरसकट कुणबी दाखला द्यावे, अशी मागणी मनोज जरांगे यांनी केली आहे.

मागील दहा दिवसांपासून सुरू असलेल्या उपोषणामुळे मनोज जरांगे यांची प्रकृती खालावली आहे. त्यांच्या पोटात अन्नाचा कणही न गेला नाही. केवळ पाणी आणि सलाईनवर असलेल्या जरांगे यांचा रक्तदाब कमी झाला असून किडनीवरही परिणाम होत आहे. उपोषणस्थळी दाखल झालेले मेडिकल पथक त्यांच्या प्रकृतीवर बारीक लक्ष ठेऊन आहे. त्यांची प्रकृती पाहता सरकारही चिंतेत आहे.

कोंडी सापडलेले शिंदे सरकार वारंवार जरांगे यांची मनधरणी करीत आहे. बुधवारी झालेल्या मंत्रिमंडळाच्या बैठकीनंतर मुख्यमंत्री एकनाथ शिंदे यांनी मराठवाड्यातील मराठ्यांकडे जर निजामकालीन शैक्षणिक आणि महसुली नोंदी असल्यास त्यांना कुणबी दाखले दिले जातील, अशी घोषणा केली आहे. या निर्णयानंतर जरांगे यांनी आपली भूमिका स्पष्ट करत उपोषण सुरूच ठेवणार असल्याचे सांगितले.

जरांगे म्हणाले, मराठा आरक्षणासंदर्भात काल सरकारने काल निर्णय घेतला. पण या आदेशाची प्रत आमच्यापर्यंत आली नाही. मराठा समाजातल्या ज्या लोकांकडे कुणबी असल्याची नोंद आहेत, त्यांना आजपासून कुणबी दाखले देण्यात येणार आहे. पण सरसकट मराठा समाजाला कुणबी दाखले देण्याची आमची मागणी आहे.

तसेच सरसकट दाखले देण्यासाठी एक महिन्याची वेळ सरकारने मागितली आहे. तर, आमच्याकडे कुणाकडेच कुणबी असल्याच्या वंशावळीच्या नोंदी नाहीत. त्यामुळे कालच्या निर्णयाचा काहीच फायदा होणार नाही. त्यामुळे यात सरकारने सुधारणा करत सरसकट कुणबी दाखले दिले पाहिजेत, अशी मागणी मनोज जरांगे यांनी केली आहे.