यवतमाळ  ः कोरोना विषाणूंचा प्रादुर्भाव रोखण्यासाठी लॉकडाऊन जाहिर करण्यात आल्याने भाजीपाला विक्रीची अडचण शेतकऱ्यांना भेडसावत होती. दिग्रस तालुका प्रशासन व आत्माच्या पुढाकाराने शेतकरी ते ग्राहक थेट शेतीमाल खरेदी विक्रीचा पर्याय उपलब्ध करुन देत या समस्येचे समाधान शोधण्यात आले आहे.

दिग्रस शहरात तहसीलदार राजेश वजीरे, कृषी अधिकारी अर्जुन जाधव तसेच आत्मा यंत्रणा यांच्या संयुक्‍त प्रयत्नातून शेतीमाल विक्रीची साखळी तयार करण्यात आली आहे. स्वतःचे छोटे मालवाहू वाहन असलेल्या शेतकरी व बचतगटांना विक्री परवाना देण्यात आला आहे. त्या माध्यमातून फळे व भाजीपाला घरोघरी पोचविण्यासाठी पुढाकार घेण्यात आला आहे.

विश्रामगृहाच्या बाजूला, वऱ्हाडी आवळा जवळ, मानोरा चौक, शंकर नगर टॉकीज जवळ, देवनगर, मोती नगर शाळा क्रमांक तीन समोर, संभाजी नगर बैल बाजार अशा सात ठिकाणी शेतकरी गटांनी पुढाकार घेत भाजीपाला उपलब्ध करुन दिला आहे. आत्माचे दिग्रस तालुका तंत्रज्ञान व्यवस्थापक सागर बोंडे, कृषी सहाय्यक व आत्मा कर्मचारी हे देखील या मोहिमेत सहभागी झाले आहेत.