पुणे  : राज्याच्या किमान तापमानात चढ-उतार सुरूच असले तरी गारठा कायम आहे. शुक्रवारी (ता. ३१) धुळे येथील कृषी महाविद्यालयात नीचांकी ६.६ अंश सेल्सिअस तापमानाची नोंद झाली. पूर्व विदर्भातील नागपूर, गोंदिया, भंडारा, चंद्रपूर, गडचिरोलीमध्ये आज (ता. १) हलक्या पावसाचा अंदाज आहे. उर्वरित राज्यात किमान तापमानातील घट कायम राहून, गारठाही कायम राहण्याची शक्यता आहे. 

उत्तरेकडील थंड वाऱ्यांचा अभाव, ढगाळ हवामानामुळे राज्यातील थंडी गायब झाली होती. मात्र गुरुवारी (ता. ३०) अचानकपणे गारठा वाढून निफाड येथे तापमान सहा अंशांपर्यंत घसरले. कोकण, मध्य महाराष्ट्र, मराठवाड्यातही तापमानाचा पारा खाली आल्याने गारठा वाढला. शुक्रवारी (ता. ३१) विदर्भात तापमान कमी झाल्याचे दिसून आले. पुणे, धुळे, जळगाव, मालेगाव, नाशिक, निफाड, औरंगाबाद, परभणी, उस्मानाबाद, अकोला, अमरावती, बुलडाणा, गोंदिया येथे तापमान ११ अंशांच्या जवळपास किंवा त्यापेक्षाही खाली आले. 

शुक्रवारी (ता. ३१) सकाळी राज्यातील विविध ठिकाणचे किमान तापमान, सरासरीच्या तुलनेत वाढ, घट (अंश सेल्सिअसमध्ये) : पुणे ११.३ (०), धुळे ६.६, जळगाव ११.२ (-३), कोल्हापूर १६.५ (१), महाबळेश्‍वर १३.६ (०), मालेगाव ११.२ (०), नाशिक १०.८ (०), निफाड ७.५, सांगली १५.१ (०), सातारा १३.२ (-१), सोलापूर १५.९ (-१), अलिबाग १६.३ (-१), डहाणू १४.८ (-३), सांताक्रूझ १५.० (-३), रत्नागिरी १६.७ (-२), औरंगाबाद ११.९ (-१), परभणी ११.१ (-४), नांदेड १४.० (०), उस्मानाबाद १०.६ (-५), अकोला ११.२ (-४), अमरावती ११.० (-४), बुलडाणा ११.६ (-४), चंद्रपूर १२.६ (-३), गोंदिया १०.५(-४), नागपूर १२.२(-२), वर्धा १२.० (-२), यवतमाळ १३.०(-३).