सोलापूर  ः सोलापूर जिल्ह्यातील शेततळे, अस्तरीकरण कागद, ठिबक सिंचन यांचे थकित अनुदान देण्यासाठी निधी मिळावा. तसेच जिल्ह्यातील थकीत १३ हजार २६१ कृषीपंपाच्या जोडण्यांबाबत कार्यवाही व्हावी, अशी मागणी पालकमंत्री दत्तात्रय भरणे यांनी मुख्यमंत्री उद्धव ठाकरे यांच्या खरीप नियोजन बैठकीत केली.

मुख्यमंत्री ठाकरे यांच्या अध्यक्षतेखाली झालेल्या खरीप हंगाम पुर्व आढावा बैठकीत त्यांनी ही मागणी केली. या बैठकीत पालकमंत्री दत्तात्रय भरणे, जिल्हाधिकारी कार्यालयातून व्ही.सी.व्दारे सहभागी झाले. यावेळी जिल्हा परिषद अध्यक्ष अनिरुध्द कांबळे, कृषी सभापती अनिल मोटे, जिल्हाधिकारी मिलिंद शंभरकर, विशेष अधिकारी पी. शिवशंकर, जिल्हा अधिक्षक कृषी अधिकारी बसवराज बिराजदार आदी उपस्थित होते.

पालकमंत्री भरणे म्हणाले, की जिल्ह्यातून मागेल त्याला शेततळे योजनेला मागणी आहे. त्याचबरोबर शेततळ्यासाठी लागणारा कागद, ठिबक संचाचे अनुदान थकीत आहे. हे अनुदान देण्यासाठी निधी द्यावा. जिल्ह्यात १३ हजार २६१ कृषीपंपांच्या वीज जोडण्या बाकी आहेत. त्या लवकरात लवकर जोडून मिळाव्यात, अशी मागणी त्यांनी केली. शेतकऱ्यांना बांधावर खते आणि बियाणे देण्याच्या योजनेनुसार ७४७१ शेतकऱ्यांना आतापर्यंत बांधावर २२ हजार १७० क्विंटल खताचे आणि १७१ क्विंटल बियाणे वाटप करण्यात आले आहे, अशी माहितीही यावेळी देण्यात आली.