पुणे  ः निसर्ग चक्रीवादळामुळे रायगड आणि पुणे जिल्ह्यातील काही तालुक्यांत मोठे नुकसान झाले आहे. या नुकसानीचे पंचनामे सुरु करण्यात आले आहेत. नुकसानीचा आढावा घेण्यासाठी आज (ता.६) लोकप्रतिनिधी व शासकीय अधिकाऱ्यांची बैठक आयोजित करण्यात आली असून त्यात योग्य ते निर्णय घेऊन मदत केली जाईल. नुकसान भरपाईसाठी राज्य सरकारसह आम्ही केंद्र सरकारकडे मदत मागितली असून केंद्रीय पथक पाहणी करण्यासाठी येणार आहे, असे उपमुख्यमंत्री तथा जिल्ह्याचे पालकमंत्री अजित पवार यांनी सांगितले. 

श्री. पवार यांनी शुक्रवारी (ता.५) सकाळी जिल्ह्यातील मावळ तालुक्यातील भोयरे व पवळेवाडी येथे झालेल्या नुकसानीची पाहणी केली. यावेळी आमदार सुनील शेळके, जिल्हाधिकारी नवल किशोर राम उपस्थित होते. 

दरम्यान, शिवसेना उपनेते शिवाजीराव आढळराव पाटील यांनी शुक्रवारी (ता.५) जुन्नर तालुक्यातील वडज, येणेरे, निरगुडे, जुन्नर, ओतूर, नारायणगाव आदि भागांतील नुकसानीची पाहणी केली. या नुकसानीची माहिती कृषिमंत्री दादा भुसे यांनी दिल्याचे श्री. आढळराव यांनी सांगितले.