Assam Rain Update : आसाममधील पूरस्थिती मंगळवारी अत्यंत भीषण राहिली, ज्यामुळे १० जिल्ह्यांतील सुमारे ३१ हजार लोक प्रभावित झाले. भारतीय हवामान विभागाने राज्यात 'रेड अलर्ट' जारी केला आहे. अनेक जिल्ह्यांमध्ये पुढील पाच दिवसांत अतिवृष्टीचा इशारा दिला आहे.

गुवाहाटी येथील IMD च्या प्रादेशिक हवामान केंद्राने (RMC) 'स्पेशल वेदर बुलेटिन' मध्ये सोमवारपासून 24 तासांसाठी रेड अलर्ट जारी केला, त्यानंतर पुढील दोन दिवस ऑरेंज अलर्ट आणि गुरुवारी यलो अलर्ट जारी केला.

अतिवृष्टीमुळे सध्या ४४४ गावे पाण्याखाली आहेत आणि आसाममध्ये ४ लाख ७४१ हेक्टर पीक क्षेत्राचे नुकसान झाले आहे. यामध्ये चिरांग, दररंग, धेमाजी, धुबरी, दिब्रुगड, कोक्राझार, लखीमपूर, नलबारी, सोनितपूर आणि उदलगुरी जिल्ह्यांमधील पुरामुळे ३० हजार ७०० हून अधिक लोक प्रभावित झाले आहेत. त्यात म्हटले आहे की, लखीमपूर जिल्ह्यात २२ हजार हून अधिक लोकांसह सर्वात जास्त प्रभावित झाले आहे, दिब्रुगडमध्ये ३ हजार ८०० हून अधिक आणि कोक्राझारमध्ये सुमारे १ हजार ८०० लोक बाधित झाले आहे.

दिमा हासाओ, कामरूप महानगर आणि करीमगंजमध्ये मुसळधार पावसामुळे भूस्खलनाची घटना घडली. सोनितपूर, नागाव, नलबारी, बक्सा, चिरांग, दररंग, धेमाजी, गोलपारा, गोलाघाट, कामरूप, कोकराझार, लखीमपूर, दिब्रुगड, करीमगंज आणि उदलगुरी येथे बंधारे, रस्ते, पूल आणि इतर पायाभूत सुविधांचेही पुराच्या पाण्याने मोठे नुकसान झाले आहे.

कछार, दारंग, जोरहाट, कामरूप महानगर, कोक्राझार आणि नलबारी जिल्ह्यात अनेक ठिकाणी पूर आला. कांपूरमधील ब्रह्मपुत्रेची उपनदी कोपिलीने धोक्याची पातळी ओलांडली आहे. नदी पात्रानजीक राहणाऱ्या लोकांचे स्थलांतर करण्यात आले आहे.