Chhatrapati Sambhajinagar News : पाण्याची उपलब्धता असलेल्या शेतकऱ्यांनी काही प्रमाणात कपाशीची लागवड केली. इतरांनी रान तयार करून खत बियाण्याची सोय लावून ठेवणे सुरू केले. काहींची ती सोयही लागली. परंतु अजून पाऊसच न आल्याने उगवलेल्या पिकांचे अंकुर संकटात सापडले असून, शेतकरी आता आकाशाकडे पाहात आहेत.
मराठवाडा विभागातील आठही जिल्ह्यांतील वहितीखालील क्षेत्र ५४.७६ लाख हेक्टर असून, खरिपाचे क्षेत्र ४७.८७ लाख हेक्टर आहे. गतवर्षीच्या खरीप हंगामातील पेरणी खालील क्षेत्र लक्षात घेता खरीप हंगाम २०२३ साठी ४८.४० लाख हेक्टर क्षेत्र प्रस्तावित करण्यात आले आहे.
आगामी खरीप हंगामासाठी नियोजनाची, प्रस्तावित क्षेत्राची माहिती कृषी विभागाकडून देण्यात आली. त्यानुसार कापूस १३.९१ लाख हेक्टर, सोयाबीन २४.८६ लाख हेक्टर, तूर ४.४४ लाख हेक्टर, मका २.३१ लाख हेक्टर असे क्षेत्र प्रस्तावित करण्यात आले आहे.
नियोजन असले आणि शेतकऱ्यांनीही आपल्या परीने तयारी केली असली, तरी गत काही वर्षांत खरीप पेरणीसाठी अपेक्षित व अपेक्षेच्या पुढे जाऊन पडणारा पाऊस जूनचा अर्धा महिना उलटला, तरी अजून मराठवाड्यात सुरूच झाला नसल्याची स्थिती आहे. त्यामुळे शेतशिवारातील लगबग मंदावली आहे.
जिल्ह्यातील सोयगाव, सिल्लोड परिसरांत पाण्याची उपलब्धता असलेल्या शेतकऱ्यांनी २५ मे ते १० जूनदरम्यान कपाशीची लागवड केली. काहींनी कपाशीची धूळपेरणी केली. ज्यांच्याकडे पाण्याची उपलब्धता त्यांनी पेरलेले पीक उगवूनही आणले.
परंतु ज्यांच्याकडे पाण्याची उपलब्धता नाही त्यांनी अजून पेरणी सुरू केली नाही, किंवा काहींनी नुसती धूळपेरणी करून पाणी न देता पावसाची वाट पाहणे सुरू केले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.