कोल्हापूर  : यंदाच्या हंगामात ऊस उत्पादकांना किफायतशीर भाव मिळवून देण्यासाठी महत्त्वपूर्ण ठरणारी स्वाभिमानी शेतकरी संघटनेची ऊस परिषद २७ ऑक्‍टोबरला जयसिंगपूर (ता. शिरोळ) येथे होणार आहे. उदगाव (ता. शिरोळ) येथे संघटनेच्या वतीने झालेल्या मेळाव्यात खासदार राजू शेट्टी यांनी ही माहिती दिली. येथून पुढे एक महिना या परिषदेच्या निमित्ताने विविध ठिकाणी मेळावे घेऊन परिषदेला उपस्थित राहण्याचे आवाहन करण्यात येणार असल्याचे श्री. शेट्टी यांनी सांगितले.

श्री. शेट्टी यांनी या वेळी सरकारच्या नाकर्तेपणावर जोरदार टीका केली. ``दुष्काळाच्या नावाखाली भाजपने ३० हजार कोटींचा कर जमवला. राज्यातील शेतकऱ्यांचे पीककर्ज केवळ १४ हजार कोटींचे आहे. भाजपने शेतकऱ्यांना फसविण्याचा उद्योग केला. इथेनॉल ३० रुपये प्रतिलिटर मिळत असताना ९२ रुपयांचे पेट्रोल हवेच कशाला? शर्मा कृषी आयोगाने एफआरपीच्या कायद्यात दुरुस्ती करून साडेनऊ टक्के उताऱ्यावरुन दहा टक्‍क्‍यांवर आणली आहे. यामुळे वरच्या खिशात दोनशे रुपये टाकायचे आणि खालच्या खिशातून १९२ रुपये काढून घ्यायचे असा प्रकार झाला आहे. लोकसभेत मंजुरी न घेताच ही बेकायदा दुरुस्ती केली. या विरोधात सर्वाेच्च न्यायालयात याचिका दाखल करू``, असे खासदार शेट्टी म्हणाले. यंदाचा संभाव्य साखर हंगाम, गेल्या वर्षभरातील स्थिती, सरकारची भूमिका याचा अभ्यास करून परिषदेत दर मागणीची घोषणा केली जाणार असल्याचे त्यांनी सांगितले.

या वेळी सावकार मादनाईक, जालिंदर पाटील, भगवान काटे, सयाजी मोरे, विठ्ठल मोरे, राजेंद्र गड्डाण्णावर, अण्णासाहेब चौगुले, विकास देशमुख, सागर संभुशेट्टे यांनी मनोगत व्यक्त केले. नगरसेवक शैलेश चौगुले, संजय बेले, अजित पवार, रामचंद्र शिंदे, सरिता भवरे, सविता ठोमके, सुवर्णा अपराज, वैभव कांबळे आदी उपस्थित होते.