नगर  ः जिल्ह्यात यंदा सुरवातीपासून पाऊस नसल्याने त्याचा गंभीर फटका खरिपातील उडदाला बसला आहे. अपुऱ्या पावसामुळे वाढ खुंटल्याने गतवर्षीच्या तुलनेत यंदा उत्पादनात सुमारे ६० टक्के घट झाली असल्याचे कृषी विभागाच्या पाहणीतून स्पष्ट झाले आहे. गेल्या वर्षी उडदाचे हेक्टरी ५१८ किलो ८२४ ग्रॅम उत्पादन मिळाले होते. यंदा अवघे हेक्टरी १९७ किलो १६७ ग्रॅम उत्पादन मिळाले असल्याचे पीक कापणी प्रयोगातून स्पष्ट झाले आहे.

नगर जिल्ह्यात यंदा अपुरा पाऊस झाला. जूनमध्ये चांगला पाऊस झाला की सर्वाधिक पेरणी होते. मात्र यंदा मुळात सुरवातीला कमी पावसावरच उडदाची पेरणी झाली. यंदाही दरवर्षीच्या सरासरीपेक्षा तिप्पट क्षेत्रावर उडीदाची पेरणी झाली. मात्र पीक एेन बहारात असताना पावसाने ताण दिला. यंदा पुरेशा पावसाअभावी जवळपास सर्वच पिकांना फटका बसला आहे. त्यात उडीदाचे उत्पादनही मोठ्या प्रमाणात घटले आहे.

जिल्ह्यामध्ये २०१६-१७ मध्ये उडदाचे हेक्टरी ४५३ किलो ५५६ ग्रॅम उत्पादन झाले होते. गतवर्षी हेक्टरी ५१८ किलो ८२४ ग्रॅम उत्पादन मिळाले. यंदा मात्र हेक्टरी केवळ १९७ किलो १६७ ग्रॅम उत्पादन मिळाले आहे. गेल्या वर्षीच्या तुलनेत यंदा केवळ ३० ते ४० टक्केच उत्पादन निघाले असल्याचे पीक कापणी प्रयोगातून स्पष्ट झाले आहे.  त्यामुळे यंदा उडीद उत्पादक शेतकऱ्यांना पावसाअभावी मोठा आर्थिक फटका सोसावा लागत आहे. त्यात उडीद विक्रीसाठी शासकीय खरेदी केंद्रे सुरू झाली नसल्याने उडदाबाबत शेतकरी हतबल आहेत.