नागपूर : जून महिन्यात खंड देत शेतकऱ्यांसह सर्वांची चिंता वाढविणाऱ्या पावसाने ऑगस्ट महिन्यापासून जोरदार पुनरागमन केले. गत दोन दिवसांपासून पूर्व विदर्भातील गडचिरोली, चंद्रपूर, नागपूर, भंडारा, गोंदिया तसेच चंद्रपूर जिल्ह्यात पावसाची संततधार सुुरू आहे. जोरदार पावसामुळे नद्यांना पूर आला असून गडचिरोली जिल्ह्यातील तब्बल २०० गावांचा संपर्क तुटला आहे. पर्लकोटा, पामलगौतम, प्राणहितासह अनेक नद्या दुथडी भरून वाहत असल्याने गेल्या दोन दिवसांपासून पूरस्थिती कायम आहे. 

पूर्व विदर्भातील चंद्रपूर, भंडार, गोंदिया तसेच नागपूर जिल्हयाल्ह्याच्या काही भागांत धान लागवड होते. परंतू सुरवातीला पावसाने दडी मारल्याने भंडारा जिल्ह्यात धान रोवणीच्या कामांवर परिणाम झाला. त्यानंतर पावसाने हजेरी लावली. परिणामी पेरण्या कशाबशा ९४ टक्क्यांपर्यंत पोचल्याचे कृषी विभागाच्या सूत्रांकडून सांगण्यात आले. सुरवातीला कमी बरसलेल्या पावसाने त्यानंतर आपला अनुशेष भरून काढला.

पूर्व विदर्भासह पश्चिम विदर्भातील अकोला, अमरावती जिल्ह्यातही पावसाची संततधार सुरू आहे. गडचिरोली जिल्ह्यात गेल्या दोन दिवसांपासून सुरू असलेल्या पावसामुळे अनेक मार्गांवरील वाहतूक ठप्प झाली आहे. पर्लकोटा नदीला आलेल्या पुरामुळे भामरागड तालुक्‍यातील तब्बल दोनशे गावांचा संपर्क तुटला आहे. गेल्या दोन दिवसांपासून ही गावे संपर्कहीन झाल्याने या भागातील ग्रामस्थांसमोरील अडचणीत वाढ झाली आहे. गडचिरोली शहरातील रस्तेदेखील जलमय झाले होते. गडचिरोली नगरपालिका कार्यालयात देखील पावसाचे पाणी शिरले. शेकडो घरे आणि वस्त्यांमध्ये पावसाचे पाणी शिरल्याने नागरिकांच्या अडचणीत वाढ झाली. बुधवारी दुपारनंतर गडचिरोली शहरात पावसाने उघडीप दिली होती. अमरावती जिल्हयाच्या काही भागात पावसाने जोरदार हजेरी लावली. नागपुरातदेखील बुधवारी मुसळधार पाऊस झाला.