नगर : नगर येथील दादा पाटील शेळके कृषी उत्पन्न बाजार समिती सध्या शेतमालाचे लिलाव सुरू आहेत. मात्र गेल्या आठ दिवसांपासून कोरोना संसर्गाच्या धास्तीने शेतकऱ्यांचा शेतमाल विक्रीला फारसा प्रतिसाद मिळताना दिसत नाही. आवकेवरही परिणाम झाला दिसत आहे. सोमवारी (ता. १९) केवळ चिंचेचे लिलाव झाले तर मंगळवारी (ता. २०) हरभरा, चिंचेचे लिलाव झाले. 

नगर जिल्ह्यात गेल्या आठ दिवसांपासून कोरोना संसर्गाची बाधा झालेल्या रुग्णांच्या संख्येत मोठी वाढ होत आहे. दर दिवसाला साडेतीन हजार रुग्णांना बाधा होत असल्याचे तपासणी आढळून येत आहे. याचा आरोग्य यंत्रणेवर ताण पडत आहे. त्यामुळे जिल्हा प्रशासनाने दोन दिवसांपासून जनता कर्फ्यू लावला आहे. त्याचा परिणाम बाजार समितीमधील लिलावावर होत आहे. भाजीपाला बाजारात सोमवारी (ता. १९) लोकांनी गर्दी केल्याने भाजीपाल्याचे लिलाव बंद केले आहेत.

भुसारचे लिलाव सुरू असले तरी तेथेही शेतकरी शेतमाल विक्रीसाठी येत नाहीत. त्यामुळे सोमवारी (ता.२०) फक्त चिंचेचे लिलाव झाले. मंगळवारी हरभरा, चिंचेची अल्प आवक झाली. कोरोनाच्या धास्तीने बाजार समितीत आवकही घटली आहे, असे बाजार समितीतून सांगण्यात आले.