सोनाळी  : यंदा अतिपावसाच्या फटक्‍यामुळे ऊस पिकात घट झाली आहे. विविध अडचणींमुळे जिल्ह्यात ७० ते ७५ टक्के गुऱ्हाळघरे बंद आहेत. ऊस उत्पादनातील घट, व्यापारांची मनमानी, मजुरांची कमतरता, विविध रोगांचा प्रादुर्भाव, गूळ तयार करण्यासाठी खरेदी कराव्या लागणाऱ्या साहित्यांत्या किमतीत झालेली वाढ, बॅंकांचा कर्जासाठी तगादा आदी कारणांमुळे गुऱ्हाळ मालक मेटाकुटीला आले आहेत. विविध संघटना व कारखानदांराकडून ऊसदराचा तिढा सुटल्याने गुऱ्हाळ हंगाम लवकर संपणार आहे. अनेक रोगांमुळे ऊस उत्पादनात ३० ते ४० टक्के घट होण्याची भीती व्यक्त केली जात आहे. गेल्या वर्षी ऊस क्षेत्रात वाढ झाली होती पण यंदा अतिपाऊस  रोगांमुळे उसाची उंची वाढली नाही. त्यामुळे उसाचे वजन घटले आहे.   गुऱ्हाळ मालकांनी हंगामासाठी ७ ते  ८ लाखांची गुंतवणूक केली आहे. सध्या गुऱ्हाळघरावर काम करणाऱ्या मजुराला दिवसाला २२५ ते २५० रुपये मजुरीबरोबरच दोन किलो गुळ द्यावा लागतो. तर काही गुऱ्हाळघरावर बिहारी मजुराला दिवसाला ३०० रुपये मजुरी व दोन किलो गूळ द्यावा लागतो. गुऱ्हाळ मालकाचा विचार केल्यास एका आदणाला २०००ते २२०० रुपये खर्च येतो. गुऱ्हाळ घरावर काम करण्यासाठी मजुरांची कमतरता आहे. काही ठिकाणी महिलांही काम करत आहेत.

वीज प्रश्न गंभीर हंगामात सतत खंडित होणाऱ्या वीजपुरवठ्यामुळे गुऱ्हाळ मालक अडचणीत आले आहेत. मुळातच मनुष्यबळाची कमतरता असताना वीज नसल्याने. मजुरांना तासन्‌तास बसून रहावे लागते. डिझेल्या वाढत्या किमतीमुळे डिझेल इंजिनवर गुहाळ चालवणे ही शक्‍य होत नाही.  

शेतीला लागणारी खते  बि-बियाणे, नांगरट, पाणी, मशागत, मनुब्यबळ आदी खर्च शेतकऱ्यांना जास्त असल्याने गुळाला ६००० रुपयांपर्यंत दर मिळाला तरच शेतकऱ्यांना ऊस शेती करणे परवडेल.   - कुंडलिक पाटील, शेतकरी, हसूर दुमाला

३४०० ते ४२०० रुपये दर गुऱ्हाळ मालकांना न परवडणारा आहे. वीज, मजुरांचा पगार व इतर खर्च वजा जाता गुन्हाळमालकांना हा दर तोट्याचा आहे. त्यामुळे सरासरी ५५०० ते ६०००   रुपये दर दिला तरच गुऱ्हाळघरे सुरू राहतील, अन्यथा गुन्हाळघरे बंद करावी लागतील.  - दिगंबर अतिग्रे, गुऱ्हाळ मालक, हिरवडे खा.