सोलापूर  ः  महिला बचतगट हे ग्रामीण भागातील महिलांना सक्षम करण्याचे उत्तम साधन असून,  ग्रामीण भागातील महिलांनी जास्तीत-जास्त बचतगट स्थापन करून आर्थिक प्रगती साधावी, असे जिल्हा परिषदेचे मुख्य कार्यकारी अधिकारी प्रकाश वायचळ यांनी सोमवारी (ता. १७) येथे केले. जिल्हा ग्रामीण विकास यंत्रणा व महाराष्ट्र राज्य ग्रामीण जीवनोन्नती अभियान सोलापूर यांच्या वतीने आयोजित केलेल्या रुक्‍मिणी जत्रा या प्रदर्शनाचे उद्‌घाटन कार्यक्रमाप्रसंगी ते बोलत होते. या वेळी जिल्हा परिषदेचे अध्यक्ष अनिरुद्ध कांबळे, जिल्हा परिषदेचे उपाध्यक्ष दिलीप चव्हाण, जिल्हा परिषदेचे सभापती विजयराज डोंगरे, सभापती स्वाती शटगार, संगिता धांडोरे, मोहोळ पंचायत समितीच्या सभापती श्रीमती पोतदार, जिल्हा परिषदेचे सदस्य वसंत देशमुख, जिल्हा ग्रामीण विकास यंत्रणेचे प्रकल्प संचालक अनिलकुमार नवाळे, विदर्भ कोकण बॅंकेचे विभागीय व्यवस्थापक सुहास काकडे, बॅंक ऑफ इंडियाचे विभागीय व्यवस्थापक अजय कडू, बॅंक ऑफ महाराष्ट्राचे विभागीय व्यवस्थापक सुनिता भोसले आदी उपस्थित होते. मुख्य कार्यकारी अधिकारी वायचळ म्हणाले, महिला बचत गटांच्या उत्पादनांना चांगली बाजारपेठ व उत्पादनांच्या विक्री व वृद्धीसाठी बचत गटांनी उत्पादनांची विक्री करण्याचा प्रयत्न करावा. जिल्ह्यात एकूण १९ हजार बचतगट असून, या गटांना व्यवसाय करण्यासाठी बॅंकांनी पतपुरवठा केल्याने बचत गटांचे सदस्य आर्थिकदृष्ट्या सक्षम झाल्याचे त्यांनी या वेळी सांगितले.  या प्रदर्शनात सोलापूरसह सातारा, सांगली, कोल्हापूर आणि पुणे जिल्ह्यांतील महिलांनी सहभाग घेतला आहे. कार्यक्रमाचे सूत्रसंचालन आकाशवाणीचे निवेदक अभिराम सराफ यांनी केले. या वेळी सातारा, सांगली, कोल्हापूर, पुणे, सोलापूर येथील महिला बचत गटांचे सदस्य उपस्थित होते.