सिंधुदुर्ग : ‘परतीच्या पावसाने जिल्ह्यातील हजारो शेतकऱ्यांच्या भातपिकाचे नुकसान झाले. या नुकसानीचे पंचनामे येत्या दोन दिवसांत करण्यात आले नाहीत, तर कुजलेल्या भाताच्या पेंड्या घेऊन जिल्हाधिकारी आणि कृषी कार्यालयासमोर आंदोलन छेडू’, असा इशारा जिल्हा परिषद सदस्यांनी सभेत दिला.

जिल्हा परिषद कृषी समितीची सभा उपाध्यक्ष राजेंद्र म्हापसेकर यांच्या अध्यक्षतेखाली झाली. या सभेला जिल्हा कृषी अधीक्षक एस. एस. म्हेत्रे, सदस्य रणजित देसाई, महेंद्र चव्हाण, सुधीर नकाशे, संजय देसाई, गणेश राणे, प्रीतेश राऊळ आदी उपस्थित होते.

जिल्ह्यात झालेल्या अतिवृष्टीमुळे भातशेतीचे मोठे नुकसान झाले. सखल भागातील भातशेती तर पूर्णतः कुजली आहे. कापलेल्या भाताला कोंब फुटले आहेत. परंतु, तरीही शेतकऱ्यांच्या नुकसानीचे पंचनामे केले जात नाहीत, ही गंभीर बाब आहे, असा मुद्दा सदस्य रणजित देसाई यांनी उपस्थित केला. जिल्हा कृषी अधीक्षक म्हेत्रे यांना लक्ष्य केले. कृषिमंत्री दादा भुसे यांनी नुकसानीचे पंचनामे करण्याचे आदेश दिले का? असा प्रश्न कृषी अधीक्षकांना विचारला.

जिल्हाधिकाऱ्यांनी आदेश दिले आहेत. त्यानुसार तालुकास्तरावर पंचनामे करण्याच्या सूचना देण्यात आल्या आहे, असे त्यांनी सांगितले. यावरून सभेतील वातावरण अधिकच तापले. सर्वच सदस्यांनी कृषी विभागाच्या कार्यपद्धतीवर नाराजी व्यक्त केली.

आजमितीस कुठल्याही शेतकऱ्यांच्या नुकसानीचे पंचनामे झालेले नाहीत. येत्या दोन दिवसांत पंचनामे झाले नाही, तर जिल्हाधिकारी आणि कृषी कार्यालयावर कुजलेल्या पेंड्या घेऊन आंदोलन करू, असा इशारा सदस्यांनी दिला.

नकाशे यांनी गेल्यावर्षी नाचणी, भुईमूग या पिकांचे नुकसान झाले होते. परंतु, या पिकांना भरपाई देण्यात आली नव्हती, असे स्पष्ट केले. त्यामुळे ज्या पिकांचे नुकसान होईल, त्या पिकाला नुकसान भरपाई द्यावी, अशी मागणी त्यांनी केली. या विधेयकाचा स्वीकार राज्य सरकारने करावा, असा ठराव करण्यात आला.