नगर  ः पावसाळ्याचे आता अडीच महिने संपले आहेत, पण जोराचा पाऊस नसल्याने पाणीटंचाईची तीव्रता कमी होताना दिसत नाही. सध्या जिल्ह्यातील ३५१ गावांत तब्बल ३९६ टॅंकरद्वारे पाणीपुरवठा सुरू आहे. उन्हाळ्यात पाणीपुरवठा करण्यासाठी सुरू केलेले टॅंकर सप्टेंबर महिन्यातही कायम ठेवण्याची आत्तापर्यंतची ही पहिलीच वेळ आहे.

नगर जिल्ह्यामधील एखादा अपवाद वगळला तर जवळपास सर्वच गावांनी यंदाच्या उन्हाळ्यात तीव्र दुष्काळ सोसला आहे. गेल्या वर्षी पावसाळ्यात पाऊस झाला नाही. परतीचा पाऊस देखील आला नाही. त्यामुळे पाणी साठवण झाले नाही. त्यामुळे पाणीटंचाई कायम आहे. ग्रामीण भागातील लोकांची तहान भागवण्यासाठी गेल्या वर्षी ऑक्टोबरपासून टॅंकरने पाणीपुरवठा केला जात आहे. यंदा उन्हाळ्यात टॅंकरचा आकडा साडेआठशेंवर गेला होता. 

अल्प पावसावर पिके चांगली दिसत असली तरी, अनेक तालुक्यांत चांगला पाऊस नाही. त्यामुळे पाणीटंचाई कायम आहे. गेल्या वर्षी उन्हाळ्यात तहान भागवण्यासाठी सुरू केलेल्या टॅंकरची संख्या कमी झालेली असली तरी तब्बल ३५१ गावांत आणि दोन हजारांपेक्षा अधिक वाडी वस्त्यांवरील लोकांची तहान भागवण्यासाठी पावसाळ्यातही पाण्याचे टॅंकर सुरू ठेवावे लागले आहेत. आत्तापर्यंतची अशी पहिलीच वेळ आहे. मध्यंतरी पंधरा दिवसांपूर्वी टॅंकरची संख्या कमी झाली होती. मात्र आता पुन्हा संख्या वाढली आहे. ग्रामीण भागात जनावरांच्या पाण्याचाही प्रश्न अधिक गंभीर असल्याने पशुपालक त्रस्त आहेत. टंचाई असलेल्या भागात जोरदार पावसाची प्रतीक्षा कायम आहे. 

तालुकानिहाय टॅंकरची संख्या  : संगमनेर ः १८, नेवासा ः ८, राहाता ः ५, नगर ः २९, पारनेर ः ५९, पाथर्डी ः ६०, शेवगाव ः ५७, कर्जत ः ३९, श्रीगोंदा ः २४. कर्जत ः ६०, राहुरी ः १ पारनेर नगर पंचायत ः ५, जामखेड नगर पंचायत ः ३१.