पुणे : कमाल तापमान चाळिशी पार पोचल्याने विदर्भ, मध्य महाराष्ट्रात उन्हाचा चटका आणखी वाढला आहे. शुक्रवारी (ता. २५) सकाळपर्यंतच्या २४ तासांमध्ये विदर्भातील अकोला येथे देशातील उच्चांकी ४२.० अंश सेल्सिअस तापमानाची नोंद झाली. आज (ता. २६) राज्यात उन्हाचe ताप वाढणार आहे. तर तळ कोकण, दक्षिण मध्य महाराष्ट्रात ढगाळ हवामानासह तुरळक ठिकाणी हलक्या पावसाची शक्यता हवामान विभागाने वर्तविली आहे. 

कमाल तापमानात झालेल्या वाढीमुळे राज्यात सातत्याने उन्हाच्या झळा वाढतच आहेत. विदर्भासह राज्यात कमाल तापमानासह, ढगाळ हवामानामुळे उकाड्यातही वाढ झाली आहे. विदर्भात अनेक ठिकाणी तर मध्य महाराष्ट्रात काही ठिकाणी तापमान चाळीस अंशांच्या पुढे गेले आहे. नगर येथे ४१.४ अंश सेल्सिअस तापमानाची नोंद झाली असून, तापमानात सरासरीपेक्षा ५.१ अंशांची वाढ झाल्याने तेथे उष्णतेची लाट आली आहे.

दरम्यान मध्य महाराष्ट्र आणि परिसरावर असलेली चक्राकार वाऱ्यांची स्थिती निवळली आहे. तर पश्चिम विदर्भापासून, मराठवाडा, कर्नाटक, तमिळनाडूपर्यंत वाऱ्याचे प्रवाह खंडित झाल्याने हवेचा कमी दाबाचा पट्टा सक्रिय आहे. अरबी समुद्रात लक्षद्वीप बेटांजवळ समुद्रसपाटीपासून १.५ किलोमीटर उंचीवर चक्राकार वाऱ्यांची स्थिती आहे. राज्यात ढगाळ हवामान होत असून,  आज (ता. २६) सिंधुदुर्ग, कोल्हापूर, सांगली जिल्ह्यात तुरळक ठिकाणी पावसाचा अंदाज आहे. 

शुक्रवारी (ता. २५) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान (अंश सेल्सिअसमध्ये) : पुणे ३७.८, नगर ४१.५, धुळे ३९.०, जळगाव ४०.२, कोल्हापूर ३४.८, महाबळेश्वर २८.८, नाशिक ३७.२, निफाड ३६.८, सांगली ३६.४, सातारा ३७.१, सोलापूर ४०.५, सांताक्रूझ ३५.३, डहाणू ३२.२, रत्नागिरी ३२.५, औरंगाबाद ३८.४, नांदेड ३९.०, परभणी ३९.०, अकोला ४२.०, अमरावती ४१.२, बुलडाणा ३९.०, ब्रह्मपुरी ४०.२, चंद्रपूर ४०.६, गोंदिया ३८.४, नागपूर ३८.२, वर्धा ३९.०, यवतमाळ ३९.५.