कोल्हापूर: ‘स्वाभिमानी’ची यंदाची व १९ वी ऊस परिषद २ नोव्हेंबरला जयसिंगपूर येथील विक्रमसिंह क्रीडांगणावर होणार असल्याची माहिती स्वाभिमानी शेतकरी संघटनेचे नेते माजी खासदार राजू शेट्टी यांनी शुक्रवारी (ता.१६) दिली. 

गळीत हंगामाचा बिगुल वाजू लागला आहे. या पार्श्वभूमीवर चालू वर्षी स्वाभिमानी शेतकरी संघटनेच्यावतीने घेण्यात येणाऱ्या ऊस परिषदेच्या नियोजनाबाबत सांगली व कोल्हापूर जिल्ह्यातील प्रमुख पदाधिकारी यांची शिरोळ येथील शेट्टी यांच्या निवासस्थानी बैठक घेण्यात आली. 

श्री. शेट्टी म्हणाले, की साखर कारखानदारांनी शेतकऱ्यांना आव्हान देत शेतकऱ्यांकडून दबाव टाकून सह्या घेतल्या असल्याने शेतकऱ्यांना आता रस्त्यावरची व कायदेशीर अशी दोन्ही लढाई लढावी लागणार आहे. सर्व कार्यकर्त्यांनी संघटनेच्यावतीने ऊस उत्पादक शेतकऱ्यांना एक रकमी एफआरपी मिळण्यासाठी साखर आयुक्तांकडे अर्ज पाठवण्याचे आवाहन केले. 

‘‘सध्या सरकारने सिनेमाग्रह, हॉटेल, रेस्टॉरंट सुरू करण्यास परवानगी दिली आहे. राज्य सरकारमधील मंत्र्यांनीच १ नोव्हेंबर नंतर राज्यातील लॉकडाऊन शिथिल करणार असल्याचे सूतोवाच केले आहे. याच पार्श्वभूमीवर आम्ही मुख्यमंत्री उध्दव ठाकरे यांना पत्र लिहून गेली १८ वर्षे ऊस हंगाम सुरू होण्यापूर्वी जयसिंगपूरच्या ऊस परिषदेत ऊसदर ठरत असल्याने सरकारने ऊस परिषदेला परवानगी द्यावी, अशी मागणी केली आहे. राज्यातील सर्व कार्यकर्त्यांनी कंबर कसून कामाला लागावे व १९ वी ऊस परिषद यशस्वी करावी,’’ असे आवाहन श्री. शेट्टी यांनी केले. 

यावेळी प्रदेशाध्यक्ष प्रा. जालंदर पाटील, प्रदेश उपाध्यक्ष विठ्ठल मोरे, स्वाभिमानी शेतकरी संघटनेचे कोल्हापूर जिल्हाध्यक्ष जनार्दन पाटील, सांगली जिल्हाध्यक्ष पोपट मोरे, महेश खराडे, वैभव कांबळे, आण्णासो चौगुले , आदिनाथ हेमगीरे, मिलींद साखरपे, अजित पोवार, यांचेसह प्रमुख पदाधिकारी उपस्थित होते.