परभणी : जिल्ह्यात २०१७-१८ मध्ये १९ हजार ३१० हेक्टरवर ऊस लागवड झाली आहे. त्यामुळे २०१८-१९ मध्ये खोडवा आणि नवीन लागवड मिळून एकूण २८ हजार १७ हेक्टरवरील ऊस साखर कारखान्यांना गाळपासाठी उपलब्ध होईल.

सततच्या दुष्काळामुळे सिंचनासाठी पाणी उपलब्ध होत नसल्यामुळे जिल्ह्यातील उसाच्या क्षेत्रात घट झाली होती. जायकवाडी डाव्या कालव्याचे पाणी सलग दुसऱ्या वर्षी सिंचनासाठी उपलब्ध झाल्यामुळे या वर्षी जिल्ह्यातील पाथरी, मानवत, परभणी, पूर्णा या तालुक्यांतील शेतकऱ्यांनी मोठ्या प्रमाणावर ऊस लागवड केली. गुलाबी बोंडअळीचा प्रादुर्भाव झाल्यामुळे अनेक तालुक्यांतील शेतकऱ्यांनी कपाशीचे पीक मोडून टाकत त्या ठिकाणी ऊस लागवड केली.

कापूस, सोयाबीन आदी पीकांच्या उत्पादनात विविध कारणांनी सातत्याने घट येत आहेत. यंदा जायकवाडी धरण भरले होते. त्यामुळे डाव्या कालव्याचे पाणी सिंचनासाठी उपलब्ध झाले. पुढील वर्षीदेखील धरण भरेल, सिंचनासाठी पाणी मिळेल, या आशेने अनेक शेतकऱ्यांनी ऊस लागवड केली आहे. अन्य तालुक्यांच्या तुलनेत जायकवाडी डाव्या कालव्याच्या लाभक्षेत्रात येणाऱ्या जिल्ह्यातील तालुक्यांतील ऊस लागवड क्षेत्रात वाढ झाली आहे. मात्र सिंचन सुविधेअभावी जिंतूर तालुक्यात सर्वांत कमी ऊस लागवड झाली आहे. 

जिल्ह्यात २०१७-१८ मध्ये सुरू उसाची ८७०६ आणि पूर्वहंगामी उसाची १०,६०४ अशी दोन्ही मिळून एकूण १९,३१० हेक्टवर नवीन ऊस लागवड झालेली आहे. खोडवा उसाचे क्षेत्र ८७०७ हेक्टर आहे. त्यामुळे 

२०१८-१९ मध्ये साखर कारखान्यांना एकूण २८,०१७ हेक्टवरील ऊस गाळपासाठी उपलब्ध होऊ शकणार आहे, असे कृषी विभागाच्या सूत्रांनी सांगितले.