पुणे ः जिल्ह्यातील हंगाम अंतिम टप्प्यात आला आहे. त्यामुळे साखर कारखान्यांनी आपला गळीत हंगाम आटोपण्यास सुरुवात केली आहे. येत्या दहा ते पंधरा दिवसांत जिल्ह्यातील साखर कारखाने बंद होण्यास सुरुवात होईल. त्यानंतर मजूर परतीच्या प्रवासाला निघण्याची शक्यता आहे. 

वाढता उन्हाचा चटका, वाढती पाणी टंचाई, जनावरांसाठी आवश्यक चाऱ्याची स्थिती आदींमुळे एप्रिलपासून साखर कारखाने बंद होण्याची शक्यता आहे. यंदा हंगामात सुमारे १७ साखर कारखाने सुरू झाले. त्यात सहकारी अकरा व खासगी सहा साखर कारखाने सुरू झाले होते. या साखर कारखान्यांची दैनंदिन गाळपक्षमता अडीच ते आठ हजार मेट्रिक टन आहे. अजून एक ते दीड महिना साखर कारखाने चालतील, अशी शक्यता आहे. मात्र राज्यात गेल्या पंधरा दिवसांपासून साखर कारखाने बंद होण्यास सुरुवात झाली आहे. 

एक कोटी २७ लाख मेट्रिक टन ऊसगाळप

जिल्ह्यात सर्व साखर कारखान्यांनी आतापर्यंत एक कोटी २७ लाख २० हजार ३५९ मेट्रिक टन उसाचे गाळप केले. त्यापोटी एक कोटी ३३ लाख १२ हजार ९२५ क्विटंल साखरेचे उत्पादन केले. साखर उतारा १०.४७ टक्के आहे. यात सहकारी साखर कारखान्यांनी ७९ लाख २२ हजार १४४ मेट्रिक टन उसाचे गाळप केले. त्यापोटी ८४ लाख ३५ हजार ४३० क्विटंल साखरेचे उत्पादन केले. साखर उतारा १०.६५ टक्के आहे.

खासगी कारखान्यांनी ४७ लाख ९८ हजार २१५ मेट्रिक टन उसाचे गाळप केले. त्यापोटी ४८ लाख ७७ हजार ४९५ क्विंटल साखरेचे उत्पादन केले. साखर उतारा १०.१७ टक्के निघाला आहे.