मुंबई : महाबळेश्वर येथे स्ट्रॉबेरी संशोधन केंद्राची स्थापना करण्याचा निर्णय सरकारने घेतला आहे. याबाबतचा प्रस्ताव महात्मा फुले कृषी विद्यापीठा(राहुरी)ने तयार केला असून, तो शासनाच्या मान्यतेसाठी मंत्रिमंडळाकडे पाठवला असल्याचे कृषी राज्यमंत्री सदाभाऊ खोत यांनी सांगितले.  स्ट्रॉबेरी संशोधन केंद्रामुळे दोन उच्च प्रतीच्या प्रजातींमध्ये संकर करून गोड व मोठ्या आकाराच्या फळांचे अधिक उत्पादन देणारे वाण विकसित करता येणार आहे. नवीन वाण प्रसारित करताना रोग व कीड प्रतिबंधक राहतील याची काळजी घेतली जाणार आहे. सध्या उपलब्ध असलेल्या जातींपेक्षा घट्ट फळांच्या जाती मिळतील. स्ट्रॉबेरी फळाची साठवणूक व प्रक्रिया यासाठी तंत्रज्ञान उपलब्ध करून देण्यात येईल. गेल्या दोन वर्षांपासून तांत्रिक रखडलेले हे केंद्र मार्गी लावण्याचा निर्णय मंत्रालयात झालेल्या बैठकीत नुकताच घेण्यात आला. या बैठकीला फलोत्पादन सहसंचालक जमदाडे, सातारा कृषी अधीक्षक बोरकर, महात्मा फुले कृषी विद्यापीठाचे संशोधन संचालक डॉ. शरद गडाख तसेच कुलसचिव डॉ. दिलीप पवार उपस्थित होते. स्ट्रॉबेरी लागवडीस प्रोत्साहन योजनेंतर्गत खर्चाच्या ५० टक्के किंवा ५०,००० रुपये अनुदान देण्यात येत होते. त्याच धर्तीवर २०० हेक्टर क्षेत्रावरील ही योजना लागू करण्यात येणार असल्याची माहिती मंत्री खोत यांनी दिली.