सांगली : तासगाव तालुक्यातील दुष्काळात दिलासा देणाऱ्या विसापूर पुणदी उपसा सिंचन योजना तातडीने सुरू करण्याची मागणी शेतकऱ्यांमधून होत आहे. ही योजना सुरू राहिल्यास २६ गावांतील दुष्काळात दिलासा मिळेल. पाण्याअभावी योजना बंद असल्याचे सांगितले जात आहे. त्यामुळे शेतकऱ्यांमध्ये तीव्र संताप आहे. योजना सुरू न केल्यास तीव्र आंदोलन करू, असा इशारा शेतकऱ्यांनी दिला.

टेंभू योजनेअंतगर्त राबविण्यात आलेल्या या योजनेतून गेल्या महिन्यात पाणी सोडण्यात आले. मात्र, पाणी नसल्याच्या कारणावरून गेली पंधरा दिवस योजना बंद राहिली. या योजनेच्या पाण्यामुळे सध्याच्या दुष्काळात अनेक गावांना दिलासा मिळाला होता. मांजर्डे, हतनूर, विसापूर, पासून ते सिद्धेवाडी, आरवडे, खुजगाव, लोंढे, कौलगे अशा अनेक गावांतील शेतीला या पाण्याचा लाभ होतो. 

ऐन दुष्काळात या पाण्यामुळे शेकडो एकर द्राक्षबागा वाचल्या. जनावरांच्या चारा पाण्याचा प्रश्न मिटला. पूर्व भागात या भागातून शेतीसाठी पाण्याचे टँकर सुरू होते. मात्र निवडणूक संपली आणि पाणी नसल्याच्या कारणावरून ऐन मे महिन्याच्या उन्हाच्या तडाख्यात योजनेचे पाणी बंद करण्यात आले. दुष्काळाच्या झाला  वाढत आहेत. पाऊस येण्यास आणखी दीड महिन्याचा कालावधी आहे. शेतकऱ्यांमधून तीव्र प्रतिक्रिया उमटल्या आहेत. लाभ क्षेत्रातील बागायत शेती धोक्यात आहे.