नाशिक  : निफाड तालुक्यात व परिसरात द्राक्ष काढणी हंगाम सुरू झाला आहे. द्राक्ष उत्पादकांची पॅकिंगनंतर उरणाऱ्या द्राक्षमण्यांची विक्री व्यवस्था व्हावी यासाठी लासलगाव कृषी उत्पन्न बाजार समितीने पुढाकार घेतला आहे. या अनुषंगाने निफाड तालुक्यातील उगाव येथील तात्पुरत्या खरेदी-विक्री केंद्राची सुरुवात सोमवार(ता. ३)पासून झाली असून, उघड पद्धतीने द्राक्षमणी लिलाव सुरू झाले आहेत.  द्राक्ष उत्पादक पतिंगराव ढोमसे यांच्या मालाचा पहिला लिलाव झाला, त्यास प्रतिकिलो २२ रुपये दर मिळाला. २००४ पासून उगाव येथे द्राक्षमणी खरेदी केंद्र सुरू झाले आहे. द्राक्ष उत्पादक, अडते व व्यापारी यांच्याकडून चांगला प्रतिसाद मिळाला आहे. तात्पुरत्या खरेदी-विक्री केंद्रावर द्राक्षमण्यांचा लिलाव सुरू झाला. या प्रसंगी बाजार समितीचे संचालक मोतीराम मोगल, नंदकुमार डागा, वैकुंठ पाटील, सचिव नरेंद्र वाढवणे यांसह उगाव व परिसरातील सोसायटी आणि ग्रामपंचायत पदाधिकारी, द्राक्ष उत्पादक, व्यापारी, बाजार समितीचे कर्मचारी उपस्थित होते.  नाशिक जिल्हात अनेक व्यवहारांमध्ये फसवणूक झाल्याचे प्रकार समोर आले आहे. तसेच जे काही व्यवहार होतात, त्यामध्ये व्यवहारात थेट स्पर्धा नसल्याने दर कमी मिळण्याची शक्यता असते, अशा परिस्थितीत फसवणूक टाळण्यासाठी तसेच व्यवहारात स्पर्धा तयार होण्यासाठी प्रयत्न करण्यात येत आहेत. यासाठी बाजार समितीच्या माध्यमातून १७ व्यापाऱ्यांनी नोंदणी केली आहे. द्राक्ष उत्पादकांनी माल केंद्रावर विक्री करावा व इच्छुकांनी बाजार समितीच्या लासलगाव मुख्य कार्यालयाशी संपर्क साधावा, असे आवाहन यावेळी करण्यात आले.