पिंपळनेर, जि.धुळे  : पिंपळनेर (ता.साक्री) येथील बाजार समिती बंद असल्याने उत्पादकांनी कांदा विक्रीसाठी न्यायचा कुठे, असा प्रश्‍न निर्माण झाला आहे. यामुळे पिंपळनेर बाजार समिती तत्काळ सुरू करावी, अशी मागणी अपर तहसीलदार विनायक थविल यांच्‍याकडे राज्य कांदा उत्पादक शेतकरी संघटनेने केली आहे.

पिंपळनेरसह साक्री येथील कांदा बाजार खानदेशात प्रसिद्ध आहे. या बाजारात नाशिक जिल्ह्यातील सटाणा, नंदुरबारमधील नवापुर तालुक्यातील शेतकरीदेखील कांदा विक्रीसाठी येतात. मोठी आर्थिक उलाढाल या बाजारात होत असते. परंतु शहरात दोन कांदा व्यापारी कोरोना पॉझिटिव्‍ह निघाल्याने दक्षता म्हणून कांदा लिलाव बंद केला आहे. कांदा विक्री थांबविल्यामुळे शेतकरी अडचणीत सापडला आहे.

अनेक शेतकऱ्यांचा कांदा चाळीत पडून आहे. चाळीत कांदा खराब होत आहे. साठविलेल्या कांद्यात वारंवार प्रतवारी करून घ्यावी लागत आहे. बाजारात दर कमी आहेत. नजीक कांद्यासाठी प्रसिद्ध बाजार नाही. यामुळे शेतकऱ्यांचे आर्थिक नुकसान होत आहे.

कोरोनामुळे बाजार समिती बंद करणे योग्य नाही. लॉकडाऊन हा उपाय नाही. राज्यात अनेक बाजार समित्या कोरोना वाढत असताना सुरूच आहेत. कारण शेतकऱ्यांचे नुकसान होवू नये, याची काळजी त्या भागातील प्रशासन घेत आहे. यामुळे कांदा मार्केट बंद करू नये व बाजार समिती सभापतींनी लक्ष द्यावे, असे शेतकऱ्यांचे म्हणणे आहे. याबाबत निवेदन बाजार समितीला देण्यात आले. निवेदन देताना कांदा उत्पादक शेतकरी संघटनेचे अध्यक्ष संजय भदाणे, साक्री तालुकाध्यक्ष अनिल भामरे, महेंद्र नांद्रे व शेतकरी उपस्‍थित होते. 

अतिवृष्टी अनुदान मिळालेले नाही. अनेकदा तहसिल कार्यालय, बँकेत चकरा मारल्या. परंतु, योग्य माहिती मिळत नाही. जाहीर अनुदान मदत तत्काळ मिळावे. - त्र्यंबक पाटील,  शेतकरी भदाणे (ता. धुळे)