मुंबई  ः कोल्हापूर, सांगली, सातारा या जिल्ह्यांतील पूरग्रस्त भागाचा दौरा करून पूरग्रस्तांच्या व्यथा जाणून घेतल्यानंतर राष्ट्रवादी काँग्रेसचे अध्यक्ष शरद पवार यांनी मंगळवारी मुख्यमंत्री देवेंद्र फडणवीस यांची भेट घेऊन त्यांच्याशी पूरग्रस्तांच्या मदतीबाबत; तसेच पुनर्वसनासंदर्भात चर्चा केली.

राष्ट्रवादी काँग्रेसचे प्रदेशाध्यक्ष जयंत पाटील यांनी या भेटीतील चर्चेची माहिती दिली. महापुराचा तडाखा बसलेल्या नागरिकांना संकटातून बाहेर काढण्यासाठी, नुकसानीची योग्य भरपाई करण्यासाठी, बाधितांच्या पुनर्वसनासाठी सरकारने युद्धपातळीवर प्रयत्न करावेत, अशी विनंती मुख्यमंत्र्यांना करण्यात आल्याचे श्री. पाटील यांनी सांगितले. पूरग्रस्तांच्या मदतीबाबत मुख्यमंत्र्यांना निवेदन देण्यात आले असून, त्यांनी काही मागण्या अंशत: मान्य केल्याचे श्री. पाटील म्हणाले.

मुख्यमंत्र्यांच्या अध्यक्षतेखालील मंत्रिमंडळ उपसमितीने पूरग्रस्तांना दिलासा देण्यासाठी सोमवारी काही निर्णय जाहीर केले. मात्र. या निर्णयात आणखी शिथिलता आणण्याची गरज आहे. सरकारने पूरग्रस्त शेतकऱ्यांना एक हेक्टर मर्यादेपर्यंत पीककर्ज माफ करण्याची घोषणा केली आहे. सरकारने एक हेक्टरची मर्यादा न ठेवता शेतकऱ्यांचे सर्व पीककर्ज माफ करावे. पुरामुळे ज्या घरांना भेगा पडल्या अशी घरेसुद्धा नव्याने बांधून द्यावीत.

पुरात जनावरे वाहून गेल्याने शेतकऱ्यांना जनावरापोटी ७० ते ८० हजार रुपयांपर्यंत मदत करावी. फळपिकांना एक लाख रुपयांपर्यंत नुकसानभरपाई द्यावी, अशी राष्ट्रवादीची मागणी आहे. ऊस गाळप हंगाम सुरू होणार आहे. मात्र, पुरामुळे साखर उताऱ्यात घट येणार आहे. ही घट लक्षात घेऊन सरकारने शेतकऱ्यांना अनुदान द्यावे. महापुरामुळे साखर उद्योगासमोर मोठे संकट निर्माण झाले आहे. या संकटातून साखर कारखान्यांना बाहेर काढण्यासाठी सरकारने मदत करावी, अशी मागणी केल्याचे श्री. पाटील यांनी सांगितले.