सातारा : माण, खटाव, फलटणसह कऱ्हाड, पाटण तालुक्‍यांत रविवारी (ता. १) अवकाळी पावसाने हजेरी लावली. त्यामुळे शेतकऱ्यांची पुरती धांदल उडाली. तसेच पीक आडवे पडल्याने व भिजल्याने नुकसान झाले आहे. अवकाळी पावसामुळे शेतकऱ्यांत चिंता वाढली आहे. 

माण तालुक्‍याच्या बिजवडी परिसरातील राजवडी, पाचवड, अनभुलेवाडी, जाधववाडी तसेच म्हसवड परिसरातील पुळकोटी, बनगरवाडी, जांभुळणी, भाटकी, खडकी, कारखेल आदी गावांच्या परिसरात दुपारी चारच्या सुमारास ढगांच्या गडगडाटासह अवकाळी पावसाने झोडपून काढले. सुमारे अर्धा तास पडलेल्या या पावसामुळे सर्वत्र पाणीच पाणी झाले. रस्त्यावरूनही पाणी वाहू लागले. रब्बी हंगामातील ज्वारी, गहू, हरभरा आदी काढणीस आलेल्या उभ्या पिकांना मात्र या पावसाचा फटका बसला. 

फलटण तालुक्‍यात अवकाळी पावसामुळे उभ्या पिकांचे मोठे नुकसान झाले. अचानक पाऊस आल्याने शेतकऱ्यांची धांदल उडाली. सांगवी परिसरात सोमंथळी, सांगवी, अलगुडेवाडी, माळवाडीसह अनेक ठिकाणी वादळी पावसाने गहू, ऊस, भाजीपाल्याचे मोठे नुकसान झाले. कऱ्हाड-पाटण तालुक्‍याच्या विविध भागात वादळी पावसाने हजेरी लावली. दोन दिवसांपासून हवेत वाढलेल्या उष्म्याने हैराण झालेल्यांना या पावसानंतर दिलासा मिळाला. दरम्यान पावसाने काही ठिकाणी आंब्याच्या मोहराचे नुकसान झाले, तर गव्हासह रब्बीतील काढणीला आलेल्या पिकांचेही काही प्रमाणात नुकसान झाले. 

उंडाळे परिसरात रविवारी दुपारी तीनच्या सुमारास वाऱ्यासह अवकाळी पावसाला सुरवात झाली. उंडाळे येथील आठवडा बाजार असल्यामुळे व्यापाऱ्यांची, ग्राहकांची तारांबळ उडाली. काही व्यापाऱ्यांच्या मालाचे नुकसान झाले. शेतात तोडलेला ऊस कसा बाहेर काढायचा, हा प्रश्‍न शेतकरी व ट्रॅक्‍टर चालकांपुढे निर्माण झाला आहे. ऊसतोड मजुरांच्या झोपडीमध्ये असणारे साहित्यही या पावसामुळे भिजून नुकसान झाले. खटाव तालुक्यातील कातरखटाव परिसरात जोरदार वाऱ्यासह पावसाने सुरवात केली. काही वेळातच भागात पाणी पाणी झाले. जवळपास अर्धा तास पाऊस झाला. ज्वारी पिकाची काढणी सुरू असून, ज्यांनी ज्वारी काढून रानात पसरून ठेवली आहे, त्या शेतकऱ्यांचे फार मोठे नुकसान झाले.

द्राक्षे, बाजरी, आंब्याच्या फुलोऱ्याला फटका उशिरा पेरणी केलेल्या ज्वारी, बाजरीची पिके फुलोऱ्यात असून या पिकांच्या कणसांवरील फुलोरा पावसामुळे झडून गेला. त्यामुळे उत्पादनात घट येण्याची शक्‍यता शेतकऱ्यांनी व्यक्त केली आहे. द्राक्ष बागांच्या घडाचेही या पावसाने नुकसान झाले आहे. विशेषत: आंब्याची झाडे मोहराने फुलून गेली असताना तो झडण्याचाही प्रकार घडला.