कोल्हापूर : ‘स्वाभिमानी’चे मावळते खासदार राजू शेट्टी यांनी लोकसभा निवडणुकीनंतर उसंत न घेता शेतकरी प्रश्नांसाठी पुन्हा लढण्याचा निर्णय घेतला आहे. त्यांनी कवितेद्वारे सोमवारपासून (ता. २७) संघर्षाचा नवा अध्याय सुरू केल्याचे म्हटले आहे. 

आजपासून या शिर्षकाच्या कवितेत त्यांनी भावनिकपणे आपल्या पराभवाची कारणे देत मी बळिराजाच्या काळजात घर केल्याने मला कोणी बेदखल केल्याची भीती नसल्याचे म्हणले आहे. सोशल मीडियाच्या माध्यमातून त्यांनी कविता व्हायरल करून गोरगरिबांच्या हक्कांसाठी, भूमिपुत्रांसाठी नवा एल्गार करीत असल्याचे जाहीर केले आहे. शेट्टी यांनी ही कविता सादर करून कार्यकर्त्यांना साद घातली आहे.

आजपासून... मी संत नाही शांत आहे  गोतावळ्यातून दुरावलो  याची मनात खंत आहे  कट करून गाडलेल्या  बळीचा मी पुत्र आहे  ज्याला फळं त्यालाच दगडं हे जगाचं सूत्र आहे. मी खचलो नाही थोडासा टिचलो आहे  ते कोण मला  बेदखल करणार?  मी बळिराजाच्या काळजातच  घर करून बसलो आहे. म्हणून चला...  भूमिपुत्रांनो उठा  नवा एल्गार करू...  गोरगरिबांच्या हक्कासाठी  आजपासून संघर्षाचा नवा अध्याय सुरू...!