पुणे  ः ऑक्टोबर, नोव्हेंबर महिन्यांत झालेल्या पावसामुळे रब्बी हंगामातील पेरण्यांना उशिरा सुरुवात झाली आहे. पुणे विभागात रब्बीचे सरासरी क्षेत्र १७ लाख ८१ हजार ३५ हेक्टर असून त्यापैकी आतापर्यंत तीन लाख ९७ हजार २७९ हेक्टरवर म्हणजेच सरासरी २२ टक्के क्षेत्रावर पेरण्या झाल्या आहेत. गेल्या आठवड्यापासून पावसाने उघडीप दिल्याने पेरण्यांना वेग आला आहे. पाण्याची उपलब्धता बघता पेरणी क्षेत्रात वाढ होण्याची शक्यता कृषी विभागाच्या सूत्रांनी वर्तविली आहे.

यंदा उशीर पाऊस झाला. त्यामुळे खरीप पेरण्यांना उशीर झाला होता. त्यातच ऑक्टोबर महिन्यात झालेल्या पावसामुळे रब्बी हंगामातील पेरण्यांनाही उशिराने सुरुवात झाली. विभागातील नगर, पुणे, सोलापूर जिल्ह्यांत ज्वारी, हरभरा या पिकांच्या पेरण्या काही प्रमाणात झाल्या असल्या तरी त्याचे प्रमाण कमी आहे. पावसाने उघडीप दिल्याने गहू, हरभरा पेरणीला वेगाने सुरुवात होईल.    

विभागातील नगर जिल्ह्यात रब्बी ज्वारीची पेरणी अंतिम टप्यात आली आहे. काही ठिकाणी पेरणी झालेल्या पिकावर अमेरिकन लष्करी अळीचा प्रादुर्भाव दिसून आला आहे. हरभरा पेरणीस अल्प प्रमाणात सुरुवात झाली आहे. पुणे जिल्ह्यात खरिपातील सोयाबीन, मूग, उडीद या पिकांची काढणी झाली आहे. बाजरीची काढणी अंतिम टप्यात आहे. रब्बी हंगामातील ज्वारी, हरभरा, मका या पिकांच्या पेरण्या सुरू झाल्या आहेत. पावसामुळे पिकांना काही प्रमाणात फटका बसला असून पेरणी झालेल्या पिकांच्या उगवणीचे प्रमाण कमी आहे.

सोलापूरमध्ये रब्बी हंगामातील ज्वारीची पेरणी सुरू झाली आहे. चालू महिन्यात झालेल्या पावसामुळे अक्कलकोट, दक्षिण सोलापूर व बार्शी तालुक्यांत पेरणीस विलंब होत आहे. त्याचबरोबर मोहोळ, माढा, करमाळा, सांगोला, माळशिरस व पंढरपूर तालुक्यांत पेरणी अंतिम टप्यात आहे. गहू व हरभरा पिकांची नुकतीच पेरणी सुरू झाली असून, पेरणीक्षेत्रात वाढ होण्याची शक्यता आहे.