पुणे ः गुलटेकडी येथील कृषी उत्पन्न बाजार समितीकडे जाणाऱ्या शिवनेरी रस्त्यावरील दोन्ही बाजूंना असणाऱ्या अतिक्रमणधारक फळे, भाजीपाला, हातगाडीवाले, टपऱ्या व विक्रेत्यांवर बाजार समिती प्रशासनाने अतिक्रमण कारवाई करत हा रस्ता रिकामा केला. यामध्ये जवळपास चार टन शेतीमाल जप्त करत त्याचा लिलाव समितीकडून करण्यात आला. तसेच या रस्त्यावर रोजच अतिक्रमण कारवाई केली जाणार आहे.

पुणे कृषी उत्पन्न बाजार समितीचा सुरक्षारक्षक विभाग, पदाधिकारी, कर्मचारी, वाहतूक पोलिस व महापालिकेचा अतिक्रमण विभागाने ही कारवाई केली. या कारवाईत विक्रेत्यांकडून विक्री सुरू असलेला साधारणतः चार टन माल आणि विविध साहित्य जप्त करण्यात आले आहे. जप्त करण्यात आलेला मालाचा लिलाव करण्यात आला. शिवनेरी रस्ता कायमचाच अतिक्रमणमुक्त करण्यासाठी रोजच कारवाई केली जाणार असल्याची माहिती बाजार समितीचे प्रशासक मधुकांत गरड यांनी दिली.

शिवनेरी रस्त्याच्या दुतर्फा अतिक्रमण झाले आहे. त्यामुळे कायमच हा रस्ता वाहतूक कोंडीत असतो. कोंडीला अतिक्रमण हेच मुख्य कारण असल्याने रस्ता अतिक्रमणमुक्तीचा निर्धार बाजार समिती प्रशासनाने केला आहे. शहरातून खरेदीला येणारी वाहनेही याच रस्त्याने ये-जा करतात. त्यामुळे या रस्त्यावर वाहनाचा ताण आहे.