नाशिक : ‘कोरोना’च्या पार्श्वभूमीवर देशात लॉकडाऊन सुरू असून बाजार समित्यांमध्ये लिलाव सुरू आहेत. बाजार समित्यांमध्ये कर्मचारी, माथाडी कामगार, कांदा खळ्यावरील मजूर जोखीम पत्करून काम करत आहेत. मात्र, त्यांना कोणतेही विमा संरक्षण नाही, राज्य शासनाच्या आस्थापनेवरील काम करणाऱ्या कर्मचाऱ्यांना जसे शासनाने विमा संरक्षण दिले आहे. त्याच धर्तीवर बाजार समिती कर्मचारी, माथाडी कामगार व मजूर यांनाही विमा संरक्षण द्या, अशी मागणी चांदवड बाजार समितीचे सभापती डॉ. आत्माराम कुंभार्डे यांनी मुख्यमंत्र्यांकडे निवेदनाद्वारे केली आहे. 

निवेदनात म्हटले आहे की, सध्या बाजार समित्यांमध्ये शेतमालाचे लिलाव सुरू आहेत. ‘कोरोना’ विषाणूचे संक्रमण रोखण्यासाठी बाजार समित्यांचे निर्जंतुकीकरण करणे, सोशल डिस्टन्सिंगचे पालन, आवकेप्रमाणे शेतमालाचा लिलाव, वजन माप, काटा पट्टी करणे, यासह शिस्तपालन करून कर्मचारी कामकाज करीत आहे. शेतकरी बांधवांची कुठलीही गैरसोय होऊ नये यासाठी व्यापारी व शेतकरी यांचा समन्वय ठेऊन बाजार समित्या कर्तव्य पार पाडत आहेत. मात्र, यासाठी काम करणारे कर्मचारी वर्ग, माथाडी कामगार व कांदा भरणारे मजूर यांना कुठल्याही प्रकारचे विमा संरक्षण नाही. ‘कोरोना’ विषाणूचा प्रादुर्भाव रोखण्यासाठी अत्यावश्यक सेवा बजावणाऱ्या शासनाच्या अधिपत्याखालील आस्थापनांवर कार्यरत असलेल्या कर्मचारी वर्गास शासनाने विमा संरक्षण लागू केले आहे. त्याच पार्श्वभूमीवर बाजार समितीत जोखीम पत्करून काम करणाऱ्या बाजार समितीतील कर्मचारी, माथाडी कामगार, कांदा भरणारे मजूर यांनाही विमा संरक्षण देण्याच्या मागणीचे पत्र जिल्हाधिकारी सूरज मांढरे व दिंडोरी लोकसभा मतदार संघाच्या खासदार डॉ. भारती पवार यांच्याकडे दिल्याचे त्यांनी कळविले आहे.