भंडारा ः आधारभूत खरेदी केंद्राअभावी शेतकऱ्यांच्या अडचणी वाढल्या आहेत. त्यातच वीज वितरण कंपनीकडून थकीत बिलापोटी कृषिपंपांची वीज कापली जात आहे. यामुळे रब्बी हंगामात सिंचनाचा प्रश्‍न गंभीर झाल्याचा आरोप करीत भाजप तसेच प्रहार जनशक्‍ती पक्षाने आंदोलनाचा इशारा दिला आहे. 

खरीप हंगामातील पिकांची कापणी व मळणी पूर्ण झाली आहे. धान कापणी पूर्ण झाल्याने शेतकऱ्यांनी कृषिपंपांच्या मदतीने सिंचन करून रब्बी लागवडीवर भर दिला आहे. गेल्या काही हंगामापासून पिकावर विविध किडरोगांचा प्रादुर्भाव होत आहे. त्यामुळे अपेक्षित उत्पादकता झाली नाही. त्याचा उत्पन्नावर परिणाम झाल्याने शेतकऱ्यांना कृषिपंपांच्या देयकांचा भरणा करता आला नाही. अशा स्थितीत राज्य सरकारने अडचणीतील शेतकऱ्यांना दिलासा देणे अपेक्षित होते. परंतु, वीज वितरण कंपनीकडून थकीत देयकापोटी कृषिपंपांची वीज खंडित करण्याचे धोरण अवलंबिण्यात आले आहे. 

या विरोधात प्रहार जनशक्‍ती पक्षाकडून लाखांदूर येथे आंदोलनाचा इशारा देण्यात आला आहे. जिल्हा उपप्रमुख धनराज हटवार, विधानसभा प्रमुख चंद्रशेखर टेंभूर्णे, तालुका प्रमुख प्रकाश नाकतोडे यांच्या नेतृत्वात हे किसान जनआक्रोश आंदोलन करण्यात येणार आहे. कृषिपंपांचा वीजपुरवठा खंडित करण्याच्या प्रकाराचा भाजपनेही निषेध केला आहे.