नवी दिल्ली : रुपयातील अवमूल्यन व जागतिक पातळीवर खनिज तेलाच्या किमतीत झालेल्या वाढीमुळे शुक्रवारी (ता.१४) इंधन दराने पुन्हा नवा उच्चांक गाठला. शुक्रवारी पेट्रोलमध्ये 28 पैसे, तर डिझेलमध्ये 22 पैशांची वाढ करण्यात आली. नवीन दरवाढीनुसार, दिल्लीत पेट्रोल व डिझेलचा दर अनुक्रमे 81.28 आणि 73.30 रुपये प्रतिलिटरवर पोचला आहे. मुंबईत तो अनुक्रमे 88.67 रुपये आणि 77.82 रुपये प्रतिलिटर असून, चेन्नईत 84.49 आणि 77.49 रुपये दराने पेट्रोल व डिझेलची विक्री सुरू आहे. कोलकातामध्ये पेट्रोलचा दर 83.14 रुपये, तर डिझेल दर 75.36 रुपयांवर गेला आहे. दरम्यान, ऑगस्टच्या मध्यापासून इंधन दरात सातत्याने होत असलेल्या वाढीमुळे पेट्रोल 4.20 रुपये, तर डिझेल 4.53 रुपयांनी महागले आहे.