अमरावती : किसान रेल्वेच्या माध्यमातून येत्या हंगामात संत्रा वाहतूक केली जाणार आहे. त्या अनुषंगाने रेल्वेच्या अभियांत्रिकी व वाणिज्य विभागाचे अधिकाऱ्यांनी वरुड रेल्वे स्थानकावरील तयारीचा आढावा घेतला.
विदर्भात सुमारे एक लाख हेक्टरवर संत्रा लागवड आहे. त्यातील सर्वाधिक ७० हजार हेक्टर लागवड अमरावती जिल्ह्यात असून त्यामध्ये वरुड व मोर्शी हे तालुके आघाडीवर आहेत. आंबट-गोड चवीच्या नागपुरी संत्र्यांचा सर्वांत मोठा आयातदार बांगलादेश आहे. या भागातून बांगलादेशला मोठी निर्यात होते. रस्ते मार्गाने बांगलादेश पर्यंत संत्रा पोहोचविला जातो. परंतु हा पर्याय खर्चीक आणि वेळकाढू ठरत असल्याने रेल्वेने संत्रा वाहतुकीची सुविधा उपलब्ध व्हावी अशी मागणी या भागातील संत्रा प्रक्रिया उद्योजक व शेतकऱ्यांची होती.
केंद्रीय मंत्री नितीन गडकरी देखील या संदर्भात सातत्याने पाठपुरावा करत होते. त्याची दखल घेत रेल्वे प्रशासनाच्या वतीने वरुड रेल्वे स्थानक ते बांगलादेशमधील बेनापोल या स्थानकापर्यंत रेल्वे वाहतुकीचा पर्याय उपलब्ध करून देण्याचा निर्णय घेण्यात आला आहे. त्यासाठी वरुड रेल्वे स्थानकावर असलेल्या सुविधांची आढावा रेल्वेच्या अभियांत्रिकी वाणिज्य विभागाच्या वरिष्ठ अधिकाऱ्यांनी घेतला.
संत्रा लोडिंग साठी सोयी सुविधा निर्माण करणे, दोन्ही प्लॅटफॉर्मला जोडून मालधक्क्याची उभारणी याबाबत अधिकाऱ्यांनी संबंधितांना निर्देश दिले. यावेळी रेल्वेचे वरिष्ठ वाणिज्य व्यवस्थापक कृष्णात पाटील, नितीन वर्मा, श्रीनिवास घोटकर, मनीष नागले, टि. पी. आचार्य, सोनू खान, सज्जाद खान, रियाज फार्मर्स प्रोड्युसर कंपनीचे ताज खान मजले खान, रमेश जिचकार, श्रमजीवी संत्रा कंपनीचे अध्यक्ष नीलेश मगरदे, पुंडलिक हरले उपस्थित होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.