जळगाव : रासायनिक खतांचा वापर कमी होत आहे. परंतु, त्याच्या किमती मात्र वर्षागणिक वाढत असून, वर्षभरात संयुक्त व सरळ खतांच्या किमतीमध्ये किमान १५० ते २७० रुपयांनी गोणीमागे वाढ झाली आहे. ही दरवाढ मागे घेतली जावी, अशी मागणी शेतकरी व संघटनांनी केली आहे.  युरियाचे दर मागील हंगामात किंवा मे २०१८ मध्ये २६५ रुपयांपर्यंत होते. तेव्हा ५० किलोची गोणी मिळायची. आता ४५ किलोची युरियाची गोणी २६२ रुपयांना मिळते. १२.३२.१६, डीएपी, पोटॅश, १०.२६.२६, २०.२०.१४ या खतांच्या दरातही वाढ झाली आहे. १३०० रुपयांवर संयुक्त खतांचे दर पोचले आहेत. पोटॅश, युरिया ही सरळ खते लहान शेतकरी खरिपात वापरतात. दुष्काळामुळे मागील हंगामात हाती अपवादानेच आला.  आता पुढील हंगामासाठी महागाई वाढल्याने शेतकऱ्यांची आर्थिक कोंडी वाढली आहे. डीएपीचे दर १४५० रुपये प्रतिगोणीपर्यंत आहेत. तर १२.३२.१६ चे दरही १३०० रुपयांवर आहेत. एक गोणी खरेदी करताना लहान शेतकऱ्यांच्या नाकीनऊ येत आहेत. रासायनिक खतांचा वापर शेतकऱ्यांना करावाच लागतो. कारण १०० टक्के सेंद्रीय शेती अपवादानेच केली जाते. मजुरीचे दर वाढले आहेत. शेतमालाचे दर आता वधारलेले दिसत असले तरी जेव्हा शेतकऱ्यांच्या हाती शेतमाल आला होता, तेव्हा मक्‍याचे दर १५००, कापसाचे दर ५००० ते ५४०० रुपये प्रतिक्विंटल असे होते.  ज्वारी, बाजरीची खरेदी कवडीमोल दरात व्यापाऱ्यांनी मागील नोव्हेंबरमध्ये केली. खतांसोबत बियाणे पुढे घ्यावे लागेल. यामुळे खतांची दरवाढ केंद्राने मागे घ्यावी, अशी मागणी शेतकरी संघटनेचे आत्माराम बळिराम पाटील (कापडणे, जि. धुळे) व इतर शेतकऱ्यांनी केली आहे.