पुणे ः पर्यटनातून ग्रामीण भागातील अर्थव्यवस्था बळकट करण्यासाठी पर्यटन विभागाच्या वतीने १ हजार तरुणांना मोफत ऑनलाइन प्रशिक्षण दिले जाणार आहे. यासाठी तरुणांना टुरिस्ट गाइड बनण्याची संधी राज्य सरकारने उपलब्ध करून दिली आहे. यासाठी राज्य पर्यटन संचालनालयाने पुढाकार घेतला आहे. यानुसार राज्यातील १ हजार जणांना पर्यटन गाइड बनण्यासाठीचे मोफत ऑनलाइन प्रशिक्षण देण्याचे नियोजन केले आहे. राज्याचे पर्यटन संचालक डॉ. धनंजय सावळकर यांनी माहिती दिली.

केंद्र सरकारच्या पर्यटन मंत्रालयाने तयार केलेल्या ऑनलाइन आयआयटीएफ टुरिझम फॅसिलिटेटर सर्टिफिकेशन प्रोग्रामअंतर्गत मोफत पर्यटन मार्गदर्शक प्रशिक्षण देण्यात येणार आहे. हे प्रशिक्षण पूर्ण करणाऱ्या सर्व व्यक्तींना राज्य सरकारमार्फत प्रमाणित पर्यटन मार्गदर्शक (टुरिस्ट गाइड) म्हणून प्रमाणपत्र देण्यात येणार आहे. त्यामुळे हे प्रमाणपत्र धारण करणाऱ्यांना राज्यस्तरावर किंवा राज्यातील विविध पर्यटन स्थळांच्या ठिकाणी टुरिस्ट गाइड म्हणून काम करता येईल, असेही डॉ. सावळकर यांनी स्पष्ट केले.

या डिजिटल उपक्रमामुळे इच्छुकांना त्यांच्या वेळेनुसार आणि ते ज्या ठिकाणी असतील तेथूनच त्यांच्या सवडीनुसार हे ऑनलाइन प्रशिक्षण पूर्ण करता येणार आहे. हे प्रशिक्षण घेण्यासाठी १८ ते ४० वयोगटातील व्यक्तींनी किमान बारावी तर, ४० वर्षांपेक्षा जास्त वय असलेल्यांनी किमान दहावी उत्तीर्ण असणे अनिवार्य आहे. अधिक माहितीसाठी http://iitf.gov.in या संकेतस्थळाला भेट द्यावी, असे आवाहन पर्यटन विभागाच्या वतीने करण्यात आले आहे.