सातारा ः दुष्काळावर मात करण्यासाठी शासनाने सुरू केलेल्या मागेल त्याला शेततळे योजनेस जिल्ह्यात प्रतिसाद कमी होऊ लागला आहे.  जिल्ह्यात गेल्या अडीच महिन्यांत केवळ ४४ शेततळी पूर्ण झाली आहे. जिल्ह्यात १९०० शेततळ्यांची कामे पूर्ण झाली आहेत. संरक्षित पाण्यासाठी जास्तीत जास्त शेतकऱ्यांनी या योजनेत सहभागी होण्यासाठी कृषी विभागाकडून जनजागृती करण्याबरोबर अनुदानाबरोबर वाढ करण्याची मागणी शेतकऱ्यांकडून केली जात आहे. 

राज्य शासनाने फेब्रुवारी २०१६ मध्ये मागेल त्याला शेततळे ही योजना जाहीर केली आहे. ही योजना सर्वसमावेशक झाल्यानंतर जिल्ह्यातून या योजनेस प्रतिसाद वाढला होता. मात्र, गेल्या सहा महिन्यांपासून या योजनेस प्रतिसाद कमी होऊ लागला आहे. जिल्ह्यात ठेवण्यात आलेल्या दोन हजार शेततळ्यांच्या उद्दिष्टापेक्षा जास्त म्हणजे सहा हजार ८२१ अर्ज प्राप्त झाले आहेत. त्यामध्ये पाच हजार ४८० अर्ज पात्र, तर एक हजार ३०९ अर्ज अपात्र ठरले असून, १२ अर्जांच्या छाननीचे काम सुरू आहे. पात्र अर्जांपैकी चार हजार ५३३ अर्जांना मंजुरी देण्यात आली आहे. तीन हजार ५९६ शेततळ्यांची आखणी करून दिली आहे.

सध्या ६३ शेततळ्यांची काम सुरू असून, १९०० शेततळ्यांची कामे पूर्ण झाली आहेत. युती शासनाच्या काळात मागेल त्याला शेततळे या नावाने ही योजना समावेशक करत जिल्ह्यातील सर्व तालुक्यांना लागू करण्यात आली. मात्र, या नवीन योजनेत पूर्वीच्या तुलनेत अनुदानाची रक्कम कमी करण्यात आली होती. संरक्षित पाणीसाठ्यासाठी शेततळे फायदेशीर असल्याने जास्तीत जास्त शेतकऱ्यांनी शेततळे उभारणे आवश्यक असल्याने कृषी विभागाने पुढाकार घेणे आवश्यक झाले आहे.

तालुकानिहाय शेततळ्यांची पूर्ण झालेली कामे  सातारा ११२, कोरेगाव २४७, खटाव ३३९, माण ३९५, फलटण ३५८, वाई ९९, खंडाळा १११, महाबळेश्वर १५, जावली २२, पाटण ८४, कऱ्हाड ११८.