पुणे   ः पुणे विभागात आत्तापर्यंत ४८ हजार ३७० हेक्टरवर खरीप, लेट खरीप कांद्याची लागवड झाली आहे. येत्या काळात या लागवडीच्या क्षेत्रात आणखी वाढ होण्याची शक्यता असल्याचे कृषी विभागाच्या सूत्रांनी सांगितले.

जून महिन्यापासून शेतकरी कांदा लागवडीची तयारी करतात. त्यासाठी नांगरट, रोपवाटिका, बियाणांची खरेदी करणे आदी बाबी मे - जून महिन्यात पूर्ण करतात. खरीप कांद्याची जून - जुलै, लेट खरीप कांद्याची सप्टेंबर - आॅक्टोबर तर उन्हाळी कांद्याची जानेवारी - फेब्रुवारी महिन्यात लागवड केली जाते. बहुतांशी शेतकरी खरीप, लेट खरीप आणि उन्हाळी अशा तिन्ही हंगामात कांद्याची लागवड करतात.

पाऊस झाल्यानंतर जून-जुलैमध्ये खरीप कांदा लागवडीसाठी रोपवाटिका टाकली जाते. त्यानंतर साधारपणपणे एक ते सव्वा महिन्यात कांद्याची रोपे लागवडीस येतात. त्यानंतर बहुतांशी शेतकरी जुलै-आॅगस्ट महिन्यात कांदा लागवड करतात. लागवडीनंतर सुमारे साडेतीन ते चार महिन्यांनी कांद्याची काढणी केली जाते.

यंदा परतीचा पाऊस न झाल्याने पुणे विभागातील बहुतांशी तालुक्यांत आॅक्टोबरपासून पाणीटंचाई भासत आहे. त्यामुळे शेतकऱ्यांनी रब्बीची अपेक्षा सोडून दिली असून उपलब्ध पाण्यावर पिके घेण्याकडे शेतकऱ्यांचा कल आहे. सध्या बाजारात कांद्याला बऱ्यापैकी दर असले तरी पाणी टंचाईमुळे आगामी काळात कांद्याचे दर वाढण्याची अपेक्षा गृहीत धरून शेतकरी कांदा पिकाकडे वळू लागले आहेत.

पुणे जिल्ह्याच्या हवेली, खेड, जुन्नर, आंबेगाव तालुक्यांचा पूर्व पट्टा, शिरूर, दौंड, पुरंदर, बारामती, इंदापूर तालुक्यात कांदा लागवड केली जाते. जिल्ह्यात सर्वाधिक कांदा लागवड शिरूर तालुक्यात होते. नगर जिल्ह्यात पारनेर, नगर, श्रीगोंदा, पाथर्डी, कर्जत या तालुक्यांत मोठ्या प्रमाणात कांदा लागवडी झाल्या आहेत.