पुणे  : जिल्ह्याच्या पश्‍चिम भागात पावसाच्या हलक्या ते मध्यम सरी कोसळत असल्या तरी पावसाचा जोर अपेक्षित प्रमाणात वाढलेला नाही. या पावसामुळे पेरणी झालेल्या पिकांना, भात रोपांना जीवदान मिळाले आहे. पूर्व भागातील दुष्काळी पट्ट्यात पावसाची उघडीप असल्याचे चित्र आहे. पावसाचा जोर कमी असला तरी आहे त्या स्थितीत पेरण्या करण्याकडे शेतकऱ्यांचा कल आहे.

मंगळवारी सकाळपर्यंतच्या २४ तासांमध्ये हवेली, मुळशी, मावळ, जुन्नर, खेड, आंबेगाव या तालुक्यांमध्ये हलका ते मध्यम स्वरूपाचा पाऊस पडला. उर्वरित तालुक्यांमध्ये तुरळक पाऊस पडत आहे. बहुतांशी भागात ढगाळ हवामानासह ऊन सावल्यांचा खेळ सुरू आहे. पेरणी झालेल्या पिकांच्या वाढीसाठी तसेच भाताची लागवड करण्यासाठी जोरदार पावसाची आवश्‍यकता आहे.

जिल्ह्याच्या पश्‍चिम भागात पाऊस पडत असल्याने धरणांच्या पाणलोट क्षेत्रातून धरणांमध्ये हळूहळ पाणी जमा होत अाहे. मंगळवारी सकाळी ८ वाजेपर्यंत टेमघर परिसरात १४, वरसगाव परिसरात १९, पानेशत परिसरात १७, पवना परिसरात १८, मुळशी परिसरात १३, गुंजवणी परिसरात २० तर डिंभे धरण क्षेत्रात १२ मिलिमीटर पावसाची नोंद झाली आहे.

जिल्ह्यात मंगळवारी (ता. ३) सकाळपर्यंतच्या २४ तासांमध्ये पडलेला पाऊस (मिमीमध्ये - स्रोत कृषी विभाग) : पौड ११, माले १३, मुठे १४, भोलावडे १०, काले १८, कार्ला १२, लोणावळा २१, वेल्हा २६, पानशेत १७, जुन्नर १४, बेल्हा १०, राजूर २१, कुडे १२, चाकण १२, आंबेगाव १२, पाबळ १३, केडगाव १२.