नांदेड : नांदेड, परभणी, हिंगोली जिल्ह्यांतील शेतकरी, शेतकरी चळवळीतील कार्यकर्ते, शिक्षक, पत्रकार, नागरिक, महिला असे विविध स्तरांतील व्यक्ती मंगळवारी (ता. १९) आयोजित अन्नत्याग आंदोलनात सहभागी झाले होते.

यवतमाळ जिल्ह्यातील चिल-गव्हाण येथील शेतकरी साहेबराव करपे यांनी १९ मार्च १९८६ रोजी सहकुटुंब आत्महत्या केली होती. ही शेतकऱ्यांची पहिली सहकुटुंब आत्महत्या मानली जाते. अजूनही शेतकरी आत्महत्याचे सत्र सुरूच आहे. आजवर आत्महत्या केलेल्या शेतकऱ्यांप्रती सहवेदना व्यक्त करण्यासाठी मंगळवारी (ता. १९) आयोजित  केलेल्या अन्नत्याग आंंदोलनात सहभागी होण्याचे आवाहन किसानपुत्र आंदोलनतर्फे ज्येष्ठ पत्रकार तथा शेतकरी चळवळीतील कार्यकर्ते अमर हबीब यांनी केले होते.

शेतकरी आत्महत्यांना सरकारी धोरण जबाबदार आहे. कायदे करून ते धोरण राबविले जात आहे. सरकारे बदलली, परंतु धोरणे बदलली नाहीत. जाचक कायद्यांच्या विरुद्ध तसेच शेतकरी स्वातंत्र्यासाठी करण्यात आलेल्या अन्नत्याग आंदोलनात परभणी जिल्ह्यातील परभणी, जिंतूर, सेलू, पाथरी, सोनपेठ, गंगाखेड, पूर्णा आदी तालुक्यात अन्नत्याग आंदोलन केले. तसेच नांदेड जिल्ह्यातील अर्धापूर तालुक्यातील मालेगावसह जिल्ह्यातील औंढा नागनाथ तालुक्यातील जवळा बाजार आदी गावांतील नागरिक, शेतकरी यांनी वैयक्तिक तसेच सहकुटुंब उपवास करत आंदोलनात सहभागी झाले.