परभणी ः वाढते तापमान, जोराचे वारे, उपसा यामुळे बाष्पीभवनाचा वेग वाढला असून सर्वच प्रकल्पांतील पाणीसाठ्यामध्ये झपाट्याने घट होत आहे. नखातवाडी (ता. सोनपेठ) तलावातील पाणीसाठा जोत्याखाली गेला आहे. टाकळवाडी (ता. गंगाखेड) येथील तलावाने तळ गाठला आहे. उपयुक्त पाणीसाठा संपुष्टात येत आहे. त्यामुळे यंदा लवकरच पाणीटंचाईची समस्या उद्भवणार आहे.

रविवारी (ता. २१) जायकवाडी प्रकल्पांमध्ये ३३.७२ टक्के, येलदरी धरणांमध्ये ९.२० टक्के, सिद्धेध्वर धरणामध्ये २०.१४ टक्के, निम्न दुधना प्रकल्पामध्ये २०.१४ टक्के, करपरा मध्यम प्रकल्पांमध्ये ७२ टक्के, मासोळी मध्यम प्रकल्पांमध्ये ६ टक्के, डिग्रस बंधाऱ्यामध्ये ५९.७१ टक्के, मुद्दगल बंधाऱ्यामध्ये ५३.२६ टक्के, ढालेगांव बंधाऱ्यामध्ये ५०.४१ टक्के, मुळी बंधाऱ्यामध्ये ३.३६ टक्के उपयुक्त पाणीसाठा राहिला होता.

गेल्या आठवडाभरात जायकवाडी प्रकल्पातील पाणीसाठ्यामध्ये ३.३२ टक्के, येलदरी धरणातील पाणीसाठ्यात ०.१२ टक्के, सिद्धेश्वर धरणातील पाणीसाठ्यात १.८७ टक्के, करपरा मध्यम प्रकल्पांतील पाणीसाठ्यात ३ टक्के, मासोळी धरणातील पाणीसाठ्यात २ टक्के, डिग्रस बंधाऱ्यातील पाणीसाठ्यात १.७४ टक्के, मुद्दगल बंधाऱ्यातील पाणीसाठ्यात ६.३२ टक्के, ढालेगांव बंधाऱ्यातील पाणीसाठ्यात ७.३५ टक्के घट झाली आहे.२२ लघू तलावांमध्ये सरासरी ४० टक्के पाणीसाठा आहे. परंतु, नखातवाडी (ता. सोनपेठ) येथील लघू तलावातील पाणीसाठा जोत्याखाली गेला आहे.

टाकळवाडी (ता. गंगाखेड) तलावाने तळ गाठला आहे. यंदा जिल्ह्यातील अनेक प्रकल्पांमध्ये गतवर्षीएवढा उपयुक्त पाणीसाठा उपलब्ध झालेला नाही. त्यामुळे यंदा पाणीटंचाईची समस्येची तीव्रता वाढणार आहे.