नगर ः भाजी खरेदीसाठी लोक गर्दी करीत असल्यामुळे बाजार समितीत भाजीबाजार बंद ठेवण्याचा आदेश जिल्हाधिकाऱ्यांनी दिला. त्यानंतर लोकांची गैरसोय पाहून बाजार समितीमधील भाजीपाला लिलाव सुरू करण्याचे प्रयत्न सुरू असताना आज (शनिवारी) बाजार समितीच्या भाजीपाला बाजाराजवळील रस्त्यावर भाजी खरेदीसाठी नागरिकांनी गर्दी केली होती. गर्दी कमी करण्यासाठी प्रशासनाला चांगलीच धावपळ करावी लागली. त्यामुळे बाजार समिती सुरू करण्याबाबत प्रशासन तयार होईल का, असा प्रश्न पुन्हा एकदा निर्माण झाला आहे. 

नगर येथील कृषी उत्पन्न बाजार समितीच्या आवारातच भाजीपाला लिलाव होतात. चार दिवसांपासून बाजार समिती बंद असल्याने भाजीपाला लिलावही बंद आहेत. त्यामुळे शेतकऱ्यांना भाजीपाला, फळे विकण्यासाठी मोठी अडचण निर्माण झाली आहे. त्यात दोन दिवसांपासून जोरदार पाऊस पडत असल्याने नुकसान होत आहे. 

प्रशासनाने भाजीपाला विक्रीची वाहने सोडण्याला सुरुवात केली. त्यामुळे बाजार समिती बंद असली तरी त्या परिसरात आज अनेक शेतकऱ्यांनी भाजीपाला विक्रीसाठी आणून रस्त्यावर विक्री सुरू केल्याने रस्त्यावरच भाजीपाला, फळे खरेदीसाठी शहरातील नागरिकांनी मोठी गर्दी केली. एकाच ठिकाणी दोन हजार लोक एकत्र आल्याने प्रशासनाला गर्दी पांगवण्यासाठी कसरत करावी लागली. त्यामुळे बाजार समिती सुरू करण्याबाबत प्रशासन तयार होईल का, असा प्रश्न पुन्हा एकदा निर्माण झाला आहे.