पुणे  ः गेल्या पाच ते सहा दिवसांपासून सुरू असलेल्या श्रावण सरींचा जोर आता ओसरला आहे. जिल्ह्यातील पश्चिम पट्ट्यातील मावळ, मुळशी, भोर, वेल्हा या तालुक्यांतील काही भागांत गुरुवारी (ता. १५)  हलक्या पावसाने हजेरी लावली. जुन्नर तालुक्यातील राजूर येथे सर्वाधिक ४० मिमी पावसाची नोंद झाली.  

पश्चिम पट्ट्यातील तालुक्यांमध्ये जोरदार पाऊस झाला. मात्र, मागील काही दिवसांपासून या भागात पावसाने काही प्रमाणात उघडीप दिली आहे. तुरळक ठिकाणी हलक्या सरी बरसत आहे. त्यामुळे खरीप हंगामातील पिकांना दिलासा मिळाला असून, पिके वाढीच्या अवस्थेत आहे. गुरुवारी मुळशीमधील माले येथे ३३, पौडमध्ये १३, घोटावडे येथे १०, मुठे येथे २७, पिरंगुट येथे १२ मिमी पावसाची नोंद झाली.

भोरमधील आंबवडे येथे २२ मिलिमीटर पाऊस झाला. भोलावडे येथे २१, नसरापूर येथे ५, किकवी येथे ७, संगमनेर येथे १५, निगुडघर येथे २०, भोर येथे एक मिमी पावसाची नोंद झाली. मावळमधील वडगाव मावळ येथे सहा, तळेगाव येथे चार, काळे कॉलनी येथे १४, कार्ला येथे ३३, खडकाळा येथे सहा, लोणावळा येथे ३७, शिवणे येथे १८ मिलिमीटर पावसाची नोंद झाली. वेल्ह्यातील पानशेत येथे पाच, विंझर येथे एक मिमी पावसाची नोंद झाली. आंबवणे येथे हलका पाऊस झाला. हवेलीतील पुणे शहर, खडकवासला, भोसरी, चिंचवड येथेही तुरळक सरी कोसळल्या. 

उत्तरेकडील जुन्नर तालुक्यातही तुरळक ठिकाणी हलका ते मध्यम स्वरूपाचा पाऊस पडला. डिंगोरे येथे १०, आपटाळे येथे ४ मिमी पावसाची नोंद झाली. खेडमधील वाडा येथे २०, कुडे येथे १०, पाईट येथे दोन, चाकण येथे एक, कडूस येथे दोन मिमी पावसाची नोंद झाली. आंबेगावमधील घोडेगाव, आंबेगाव, कळंब, पारगाव येथे हलका पाऊस पडला. पूर्वेकडील तालुक्यांतही पावसाने तुरळक ठिकाणी हजेरी लावली. अनेक ठिकाणी हवामान ढगाळ होते. शिरूरमधील कोरेगाव, इंदापूरातील भिगवण, इंदापूर,पुरंदरमधील सासवड, भिवंडी येथे पावसाच्या अधूनमधून सरी बरसल्या. काही ठिकाणी ऊन-सावल्यांचा खेळ सुरू होता.