पुणे: दुष्काळाच्या पार्श्वभूमीवर शेतकऱ्यांनी यंदा मोठ्या प्रमाणात पीकविमा योजनेत सहभागी होण्याची आवश्यकता आहे. त्यामुळे ‘पीकविमा शेतकरी सहभाग अभियान’ राबविण्याचा निर्णय घेण्यात आला आहे, अशी माहिती राज्याचे कृषी आयुक्त सुहास दिवसे यांनी अग्रोवनला दिली.  शेतकऱ्यांपर्यंत अद्यापही माहिती पोचलेली नाही. त्यामुळे शेतकऱ्यांसह विम्या कंपन्या, सीएससी (सेवा केंद्र) चालकांना पीकविमा कामकाज विषयक प्रशिक्षण दिले जाईल. त्यासाठी मास्टर्स ट्रेनर्स तयार केले जात असून सध्या ट्रेनर्सचे प्रशिक्षणदेखील सुरू आहे. विमा योजनेचे स्वरूप, त्यातील नियमावली, अधिकार, जबाबदाऱ्या तसेच जिल्हाधिकाऱ्यांच्या अध्यक्षतेखालील तक्रार निवारण समितीचे कामकाज या मुद्दांवर सखोल माहिती शेतकऱ्यांना प्रशिक्षणातून दिली जाईल, असे श्री. दिवसे म्हणाले.   खरिपाच्या पार्श्वभूमीवर राज्यात कृषी खात्याने हंगामपूर्व नियोजनाचे कामकाज पूर्ण केले आहे. कीटकनाशके, खते, बियाण्यांची टंचाई भासणार नाही. मी स्वतःही राज्यभर दौरे केले आहेत. मुख्यमंत्र्यांच्या अध्यक्षतेखाली राज्यस्तरीय आढावा बैठकीत या नियोजनाला परिपूर्ण रूप मिळेल. बैठकीची तारीख अद्याप निश्चित झालेली नाही, असे आयुक्तांनी स्पष्ट केले.  “आयुक्तालय स्तरावरून काही योजना लादण्यापेक्षा क्षेत्रीय मागणीचे आराखडे तयार करा, असे राज्यभर आम्ही सांगितले आहे.  शेतकऱ्यांची नेमकी गरज, संबंधित जिल्हा किंवा तालुक्याचे कृषी वैशिष्ट्ये, पाण्याची उपलब्धता तपासून अधिकारी आपआपले क्षमता आराखडे देतील. या आराखड्यानुसार आम्ही निधी व पाठबळ देणार आहोत”, असेही आयुक्त म्हणाले.  खरिपात सर्वांत जास्त लक्ष बोंड अळी, हुमणी आणि फॉल अर्ली वर्म अशा तीन किडींच्या नियंत्रणावर दिले जाईल. त्यासाठी क्रॉपसॅप योजना अधिक स्मार्ट करण्यात आली आहे. त्याला यंदा १२ हजार शेतीशाळा संलग्न करण्यात आल्या आहेत. त्यामुळे शेतकऱ्यांना चांगली प्रात्यक्षिके बघण्यास मिळतील. बांधावरच लागवड ते काढणीपर्यंत प्रशिक्षण मिळेल. कोकणात शेतीशाळा सुरू देखील झाल्या आहेत, असे आयुक्तांनी सांगितले.  विस्तार संकल्पना व्यापक करणार  कृषी विभागाकडे राज्यातील शेती व शेतकऱ्यांचा अफाट ‘डेटा’ तयार झालेला आहे. त्याचा वापर करण्यासाठी आम्ही एक ऑनलाइन व्यासपीठ (इंटिग्रेटेड ऑनलाइन प्लॅटफॉर्म) तयार करणार आहोत. त्यात क्रॉपसॅप, पीकविमा, महावेध, बाजारभाव, अनुदान योजना अशी सर्व माहिती एकत्रितपणे देण्याचे प्रयत्न चालू आहेत. शेतकऱ्यांसाठी तंत्रज्ञानाच्या साह्याने कृषी विस्तार व्यापक करण्याचे उद्दिष्ट ठेवले गेले आहे, अशी माहिती कृषी आयुक्तांनी दिली.  खरीप हंगाम नियोजनाची वैशिष्ट्ये