पुणे: अरबी समुद्र आणि बंगालच्या उपसागरावरून वाहणाऱ्या बाष्पयुक्त वाऱ्यामुळे राज्याच्या कमाल तापमानात घट झाली आहे. पूर्व आणि पश्‍चिमेकडून वाहणाऱ्या वाऱ्यांचा संगम होत असल्याने विदर्भात आज (ता. ८) हलक्या पावसाचा अंदाज आहे. विदर्भ, मराठवाडा व मध्य दक्षिण, मध्य महाराष्ट्रात असलेल्या ढगाळ हवामानामुळे राज्याच्या उकाड्यात मात्र वाढ झाली आहे.  पश्‍चिमी चक्रावाताच्या प्रभावामुळे अरबी समुद्रावरून जोरदार वारे वाहत आहेत. या वाऱ्याबरोबरच बाष्पाचा पुरवठा होत असल्याने राज्यात अंशत: ढगाळ हवामान होत आहे. कोकण, मध्य महाराष्ट्राच्या तापमानात घट झाली आहे, तर मराठवाडा आणि विदर्भात कमाल तापमान ३४ अंशांच्या आसपास असल्याने उन्हाचा चटका टिकून आहे. शनिवारी (ता. ७) चंद्रपूर येथे राज्यातील उच्चांकी ३५.५ अंश सेल्सिअस तापमानाची नोंद झाली. पावसाला पोषक हवामानामुळे वाशिम, यवतामाळ, चंद्रपूर, गडचिरोली जिल्ह्यात हलक्या पावसाची शक्यता हवामान विभागाने वर्तविली आहे.   शनिवारी (ता. ७) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे २९.८, नगर ३०.८, धुळे ३३.०, जळगाव ३२.२, कोल्हापूर ३१.१, महाबळेश्‍वर २४.९, मालेगाव ३२.२, नाशिक २७.७, निफाड २८.०, सांगली ३३.०, सातारा २९.८, सोलापूर ३४.०, अलिबाग ३१.०, डहाणू २९.९, सांताक्रूझ ३१.०, रत्नागिरी ३०.७, औरं३गाबाद २९.८, परभणी ३३.९, नांदेड ३४.०, अकोला ३४.३, अमरावती ३३.२, बुलडाणा ३०.३, चंद्रपूर ३५.५, गोंदिया ३०.०, नागपूर ३४.८, वर्धा ३४.८.