पुणे  : जिल्ह्यात गेल्या काही दिवसांपासून पावसाने हजेरी लावली आहे. गुरुवारी (ता. २५) दुपारनंतर जिल्ह्यात हलक्या पावसाला सुरवात झाली. शुक्रवारी (ता. २६) सकाळपासून ढगाळ हवामानासह पावसाच्या हलक्या सरींची रिपरिप सुरूच राहिली. गेले काही दिवस उघडीप असलेल्या धरण क्षेत्रातही पावसाने हजेरी लावली आहे.   

जिल्ह्याच्या पश्चिम भागातील तालुक्यांमध्ये पावसाला पुन्हा सुरवात झाली आहे. जुन्नर, आंबेगाव, खेड, मावळ, मुळशी, वेल्हा, भोर तालुक्यांमध्ये आलेल्या पावसाने भात पिकासह सर्वच खरिपाच्या पिकांना फायदा होणार आहे. पूर्व भागातील शिरूर, बारामती, इंदापूर, दौंड तालुक्यांमध्ये पावसाचा जोर कमी आहे.

 घाटमाथ्यासह धरणांच्या पाणलोटात पाऊस सुरू झाल्याने झरे, ओहळ पुन्हा प्रवाहित झाले आहेत. मात्र धरणांचा पाणीसाठा वाढण्यासाठी जोरदार पावसाची आवश्यकता आहे. सोमवारी (ता. ८) खडकवासला प्रकल्पातील चारही धरणात मिळून सुमारे १५.१६ टीएमसी (५२ टक्के) पाणीसाठा झाला होता. पावसाने आठवडाभर उघडीप दिल्याने खडकवासला धरणाचा पाणीसाठा निम्म्यावर आला आहे.

वरसगाव आणि टेमघर धरणात अद्यापही ५० टक्के पाणीसाठा झालेला नाही. शुक्रवारी (ता.२ ६) सकाळपर्यंत सर्वच धरणांच्या परिसरात पावसाने हजेरी लावली. डिंभे धरण क्षेत्रात ३८ मिलिमीटर, कळमोडी ७७, चासकमान ३९, वडीवळे ५९, मुळशी ४१, टेमघर ४४, वरसगाव ३२, नीरा देवघर धरण क्षेत्रात ३८ मिलिमीटर पावसाची नोंद झाली.