पुणे  : दुष्काळाच्या पार्श्वभूमीवर शेतकऱ्यांना खंबीरपणे पुढे जाण्याकरिता खरीप हंगाम आणि योजनांबाबत काटेकोर नियोजन करावे, तसेच टप्प्याटप्प्याने राज्यभर शेतीशाळा सुरू करा, अशा सूचना कृषी सचिव एकनाथ डवले यांनी दिल्या. 

कृषी आयुक्त सुहास दिवसे यांच्यासमवेत संचालकांसह राज्यातील अधिकाऱ्यांशी श्री. डवले यांनी कृषी आयुक्तालयात बैठक घेतली. क्रॉपसॅप, खरीप हंगाम तसेच विविध योजनांचा आढावा व नियोजनावर या वेळी चर्चा झाली. दुष्काळ तसेच पाऊस लांबणीवर पडत असल्याचे येणारे अंदाज यामुळे खरिपाचे नियोजन काटेकोरपणे करावे लागेल. शेतकऱ्यांना वेळेत खते, बियाणे, कीटनाशके उपलब्ध करून द्यावीत. बोंडअळीमुळे कपाशी बियाण्यांची विक्री एक जूनपासून सुरू करावी, अशा सूचना या वेळी देण्यात आल्या.

राज्यात यंदा १२ हजार शेतीशाळा सुरू केल्या जाणार आहेत. या शेतीशाळा क्रॉपसॅपच्या कामकाजाशी संलग्न केल्या जातील. त्यामुळे प्रत्येक दोन गावे मिळून एक कृषिमित्र यंदा शेतकऱ्यांना उपलब्ध होणार आहे. शेतीशाळेची सुरवात कोकणातील भात शेतीपासून केली जाण्याची शक्यता आहे. कृषी सचिवांनी राज्यातील क्रॉपसॅपच्या कामाचा आढावा घेताना कपाशीवरील बोंडअळी, उसातील हुमणी व मक्यातील फॉल अर्ली वर्मवर लक्ष ठेवण्याचे सूचित केले. कीडरोगांचा प्रतिकार करण्यासाठी कृषी खात्याने आपल्या कर्मचाऱ्यांसोबत शेतकरी, कंपन्यांचे प्रतिनिधी आणि शास्त्रज्ञांना सोबत घेऊन नियोजन करावे, असेही या वेळी निश्चित करण्यात आले.  

या वेळी कृषी उद्योग महामंडळाचे व्यवस्थापकीय संचालक अशोक करंजकर, कृषी संचालक विजयकुमार इंगळे, प्रल्हादराव पोकळे, विजयकुमार घावटे, अनिल बनसोडे, कैलास मोते, उदय देशमुख उपस्थित होते.