औरंगाबाद ः नवीन शैक्षणिक वर्षाकरिता शासकीय औद्योगिक प्रशिक्षण संस्थांमधील (आयटीआय) केंद्रीय ऑनलाइन प्रवेश प्रक्रियेस तिसऱ्यांदा मुदतवाढ मिळाली आहे. आता यासाठी ३१ ऑगस्टपर्यंत अर्ज भरता येतील. कौशल्य विकासाच्या प्रशिक्षणापासून कोणताही विद्यार्थी वंचित राहू नये, म्हणून मुदतवाढ देण्याची घोषणा कौशल्य विकास, रोजगार आणि उद्योजकता मंत्री नवाब मलिक यांनी केली आहे. आयटीआयसाठी एक ऑगस्टपासून प्रवेश नोंदणी सुरू झाली होती. यापूर्वी १४ ऑगस्ट त्यानंतर २१ ऑगस्ट अशी दोन वेळा मुदतवाढ देण्यात आली होती; परंतु तांत्रिक अडचणी लक्षात घेता कोरोनाच्या काळात कोणीही विद्यार्थी कौशल्य विकासाच्या प्रशिक्षणापासून वंचित राहू नये, यासाठी पुन्हा ३१ ऑगस्टपर्यंत मुदतवाढ देण्यात आली आहे; तसेच प्रवेश प्रोत्साहन अभियान राबविण्याची प्रक्रिया देखील सुरू करण्यात आली आहे.

मोबाईलवरून अर्ज भरण्याची सुविधा दुर्गम व ग्रामीण भागातील विद्यार्थ्यांना अर्ज करताना मोठ्या तांत्रिक अडचणींचा सामना करावा लागतो. त्यांच्यासाठी मोबाईलद्वारे अर्ज करण्याची सुविधा केली आहे. दुर्गम व ग्रामीण भागास औद्योगिक प्रशिक्षण संस्थेतील कर्मचारी भेट देऊन लॅपटॉपद्वारे इच्छुक विद्यार्थ्यांचे अर्ज भरून घेत आहेत. तसेच ज्या भागातून कमी अर्ज प्राप्त झाले आहेत त्या भागात प्रवेश अर्ज भरण्याबाबत जागृती निर्माण करण्यासाठी विशेष प्रयत्न करण्याच्या सूचना देण्यात आल्या आहेत.