हिंगोली : हिंगोली येथील नाफेडच्या खरेदी केंद्रांवर उडिद खरेदीमध्ये अनियमितता आढळून आल्यामुळे सुमारे ६०० शेतकऱ्यांचे १ कोटी ५० लाख रुपयाचे चुकारे थांबविण्यात आले आहेत. या प्रकरणाची चौकशी मुंबईच्या पथकामार्फत केली जाणार असून त्यानंतरच शेतकऱ्यांना चुकारे मिळण्याचा मार्ग मोकळा होईल. परंतु त्यासाठी चौकशी तत्काळ पूर्ण करून या प्रकरणातील दोषींवर कठोर कारवाई करणे आवश्यक आहे.

आधारभूत किंमत खरेदी योजने अंतर्गंत हिंगोली येथे खरेदी विक्री संघामार्फत नाफेडची उडिद खरेदी सुरू करण्यात आली होती. परंतु उडिद खरेदीनंतर जिल्हा विपणन अधिकारी कार्यालयाकडे पाठविण्यात आलेला अहवाल आणि प्रत्यक्षात झालेली खरेदी, वखार महामंडळाच्या गोदामात साठविलेला माल यांमध्ये तफावत येत आहे. शेतकऱ्यांना चुकारे अदा करण्यासाठी वखार महामंडळाच्या गोदामात साठवण केलेल्या शेतमालाचा योग्य अहवाल विपणन अधिकारी कार्यालयाकडे सादर करणे आवश्यक आहे.

या खरेदी केंद्रावर अनियमिता आढळून येत असल्याच्या तक्रारी करण्यात आल्या होत्या. त्यामुळे जिल्हा विपणन अधिकारी कार्यालयाने २५ नोव्हेंबर पासून खरेदी विक्री संघाकडून केली जाणारी खरेदी बंद करण्यात आली. त्यानंतर ९ डिसेंबर पासून कृषी उत्पन्न बाजार समितीमार्फत खरेदी करण्यात आली. खरेदी विक्री संघामार्फत ६७३ शेतकऱ्यांच्या ३ हजार ३४ क्विंटल उडिदाची खरेदी करण्यात आली आहे.

शेतकऱ्यांना चुकारे अदा करण्यासाठी नाफेडकडून जिल्हा विपणन अधिकारी कार्यालयाकडे निधी प्राप्त झालेला आहे. परंतु खरेदीतील अनियनिमेतेच्या तक्रारीमुळे सुमारे ६०० शेतकऱ्यांच्या उडिदाचे १ कोटी ५० लाख रुपयाचे चुकारे थांबविण्यात आले आहेत.

या केंद्रावर खरेदी करण्यात आलेला उडिद शेतकऱ्यांचाच आहे का, याबाबत सात-बारा, पेरणी क्षेत्र, आधारकार्ड, बॅंक पासबूक आदीसह खरेदी केंद्रावरील अभिलेखांची पडताळणी चौकशी पथकाकडून केली जाणार आहे.