नाशिक : ‘‘गिरणा धरणात मोठ्या प्रमाणात पाणीसाठा उपलब्ध आहे. काही समाजकंटकांनी त्या ठिकाणी विषारी द्रव्याचा वापर केल्याचे निदर्शनास आले आहे. यामुळे मोठ्या प्रमाणात धरणातील मासळी मृत झाली आहे. मासेमारी करणाऱ्या ठेकेदारासोबतच तेथे कर्तव्यास असणाऱ्यांची चौकशी करा,’’ असे निर्देश कृषिमंत्री दादा भुसे यांनी दिले.

गिरणा धरणातील पाण्यात विषारी द्रव्याचा वापर केला. त्यामुळे प्रशासनातील सर्व संबंधित अधिकाऱ्यांची आढावा बैठक शुक्रवारी (ता.१६) झाली. उपमहापौर नीलेश आहेर, महानगरपालिकेचे आयुक्त दीपक कासार, उपविभागीय अधिकारी विजयानंद शर्मा, उपायुक्त नितीन कापडणीस, गिरणा धरणाचे उपविभागीय अभियंता हेमंत पाटील, पशुधन विकास अधिकारी कदम, अतिरिक्त जिल्हा शल्यचिकित्सक डॉ. हितेश महाले यांच्याबरोबरच पोलिस प्रशासनासह विविध विभागाचे अधिकारी उपस्थित होते.

भुसे म्हणाले, ‘‘धरणातील मृत मासळीच्या सेवनामुळे नागरिकांच्या जीवितास धोका होऊ शकतो. यामुळे धरणातील मृत मासळी खुल्या बाजारात विक्री होता कामा नये, यासाठी पोलिस प्रशासनाने तत्काळ संबंधित ठेकेदारास ताब्यात घेऊन मृत मासळी तत्काळ नष्ट करा. त्याच बरोबर धरणातून ज्या पाणीपुरवठा योजना राबविल्या जातात, त्या पाणी तपासणी अहवाल प्राप्त होईपर्यंत थांबवा.’’ 

‘‘पारंपरिक पद्धतीने मासेमारी न करता मासेमारी सुकर होण्यासाठी काही समाजकंटक विविध प्रकारच्या रासायनिक प्रक्रिया करत असल्याचे निदर्शनास आले आहे. परंतु , यामुळे नागरिकांच्या जीविताशी होणारा खेळ खपवून घेणार नाही. चौकशीचे आदेश देण्यात आले आहेत. 

‘तळवाडे’तून पूर्ण क्षमतेने पाणीपुरवठा

गिरणा धरण परिसरात मोठ्या प्रमाणात मृत मासे आढळल्याने मालेगाव शहरासाठी पाणीपुरवठा थांबविण्यात आला आहे. नागरिकांची गैरसोय टाळण्यासाठी तळवाडे धरणातून पूर्ण क्षमतेने पाणी पुरवठा करण्याचे निर्देश मंत्री भुसे यांनी दिले. मालेगाव शहरासाठी पाणीपुरवठा करणारे पंपिंग स्टेशन खबरदारीचा उपाय म्हणून खंडित करण्याचे आदेश कासार यांनी दिले.